ဂျူဗင်တပ်စ်နည်းပြ အယ်လီဂရီက အီတလီဝါရင့်နောက်ခံလူ ဘိုနုချီအနေဖြင့် အသင်းသို့ ပြန်လာမည် မဟုတ်ဘဲ ပြီးခဲ့သည့်ဇန်နဝါရီလကတည်းက ၎င်းအား အသင်းသစ်ရှာဖွေရန် အကြောင်းကြားထားကြောင်း ပြောကြားခဲ့သည်။
အသက် (၃၆) နှစ်အရွယ်ရှိ အီတလီဝါရင့်နောက်ခံလူ ဘိုနုချီသည် ပြီးခဲ့သည့်ဇွန်လကုန်တွင် ဂျူဗင်တပ်စ်အသင်းနှင့် စာချုပ်သက်တမ်းကုန်ဆုံးပြီးနောက် အသင်းလက်မဲ့ဖြစ်နေသူ ဖြစ်သည်။
ဘိုနုချီအား ကိုင်တွယ်ပုံနှင့် ပတ်သက်ပြီး ဂျူဗင်တပ်စ်အသင်းအပေါ် ဝေဖန်မှုများ ရှိနေပြီး ယခုအခါ အယ်လီဂရီက အသင်းတာဝန်ရှိသူများအနေဖြင့် ကစားသမားအား စာချုပ်သက်တမ်းတိုးမည်မဟုတ်သည့် အကြောင်းကို ပြီးခဲ့သည့်ဇန်နဝါရီကတည်းက အကြောင်းကြားခဲ့ခြင်းဖြစ်ကြောင်း ပြောကြားခဲ့ခြင်းဖြစ်သည်။
အယ်လီဂရီက “အခုလို အဆုံးသတ်ရတာကို ကျွန်တော်လည်း စိတ်မကောင်းဖြစ်ရပါတယ်။ ဒါပေမဲ့ ပြီးခဲ့တဲ့ ဇန်နဝါရီလကတည်းက ကျွန်တော်တို့အနေနဲ့ ဘိုနုချီကို ရှင်းရှင်းလင်းလင်းပြောပြီးသားပါ။ ကလပ်အသင်း တာဝန်ရှိသူတွေရော ကျွန်တော်ရော သူ့ကို သေချာပြောပြီးသားပါ။ သူ့ကို အသင်းသစ် ရှာဖွေတာ ဒါမှမဟုတ် ကစားသမားဘဝက အနားယူတာလုပ်ဖို့ ကျွန်တော်တို့ ပြောပြီးသားပါ။ ဘိုနုချီဟာ ဂျူဗင်တပ်စ်အတွက် များစွာပေးဆပ်ခဲ့သူပါ။ ဂျူဗင်တပ်စ်ကလည်း သူ့အတွက် လုပ်ပေးခဲ့တာ အများကြီးပါပဲ။ ဒါပေမဲ့ အနာဂတ်အတွက် ကျွန်တော်တို့ ရှေ့ဆက်ရမှာပါ”ဟု ပြောကြားခဲ့သည်။
လက်ရှိတွင် ဘိုနုချီအား ခေါ်ယူရန် ဥရောပအသင်းအချို့အပါအဝင် အမေရိကန်မေဂျာလိဂ်နှင့် ဆော်ဒီကလပ်အသင်းများက စိတ်ဝင်စားနေကြောင်း သိရှိရသည်။
