မန်စီးတီးအသင်းသည် မန်ချက်စတာဒါဘီပွဲစဉ်တွင် မြို့ခံပြိုင်ဘက် မန်ယူအသင်းကို (၄-၁)ဂိုးဖြင့် အနိုင်ရခဲ့ပြီးနောက် နည်းပြ ဂွါဒီယိုလာလက်ထက် ပရီးမီးယားလိဂ်ပြိုင်ပွဲ၌ (၄)ဂိုးနှင့်အထက် သွင်းယူနိုင်သည့် ပွဲ(၅၀)ပြည့်မြောက်ခဲ့ကြောင်း သိရသည်။
မန်စီးတီးအသင်းသည် မန်ယူအသင်းကို ဒီဘရိုင်းနား၊ မာရက်ဇ်တို့၏ သွင်းဂိုးများဖြင့် အနိုင်ရရှိခဲ့ခြင်းဖြစ်ပြီး ဒုတိယနေရာမှ အဓိကပြိုင်ဘက် လီဗာပူးလ်အသင်းကို (၆)မှတ် ဆက်ဖြတ်ထားနိုင်ခဲ့သည်။
ဂွါဒီယိုလာသည် မန်စီးတီးအသင်းကို ၂၀၁၆-၁၇ ရာသီတွင် စတင်တာဝန်ယူကိုင်တွယ်ခဲ့ပြီး ပထမဆုံးပရီးမီးယားလိဂ်ပွဲ၌ ဆန်းဒါးလန်းအသင်းကို (၂-၁) ဂိုးဖြင့် အနိုင်ရရှိခဲ့သည်။
လက်ရှိအချိန်တွင် ပရီးမီးယားလိဂ်ပွဲပေါင်း (၂၁၈)ပွဲ ကိုင်တွယ်ခဲ့ပြီဖြစ်ပြီး (၁၆၂)ပွဲနိုင်၊ (၂၆)ပွဲ သရေ၊ ပွဲ(၃၀)ရှုံးနိမ့်ခဲ့သည်။
အဆိုပါနိုင်ပွဲ(၁၆၂)ပွဲအနက် ပွဲ (၅၀)တွင် ပြိုင်ဘက်အသင်းအား (၄)ဂိုးနှင့်အနက် သွင်းယူနိုင်ခဲ့ခြင်းလည်းဖြစ်သည်။
ယင်းမှတ်တမ်းမှာ ပရီးမီးယားလိဂ်သို့ ၎င်း စတင်ရောက်ရှိချိန်ကတည်းက အခြားပြိုင်ဘက်အသင်း အားလုံးထက် ပိုမိုသာလွန်သည့် တိုက်စစ်စွမ်းဆောင်ရည်ဖြစ်ကြောင်း သိရသည်။
၂၀၁၆-၁၇ ရာသီမှ လက်ရှိအချိန်အထိ ပရီးမီးယားလိဂ်တွင် (၄)ဂိုးနှင့်အထက် သွင်းယူနိုင်သည့် ပွဲအများဆုံးအသင်းအဖြစ် မန်စီးတီးအသင်းက ဦးဆောင်နေခြင်းဖြစ်ပြီး ဒုတိယနေရာတွင် လီဗာပူးလ်အသင်းက (၄၁)ပွဲဖြင့် ရပ်တည်နေကြောင်း သိရသည်။
ထိပ်ဆုံး(၆)နေရာကို ပရီးမီးယားလိဂ် Big Six အသင်းများပင် ရယူထားနိုင်သော်လည်း မန်ယူအသင်းက ပွဲ(၂၀)ဖြင့် နံပါတ်(၆)နေရာ ရောက်ရှိနေကြောင်း သိရသည်။
ဂွါဒီယိုလာသည် မန်ယူအသင်းနှင့်ပွဲတွင် ထူးခြားသည့် မှတ်တမ်းသစ် ရယူနိုင်ခဲ့ခြင်းဖြစ်သော်လည်း မန်ချက်စတာဒါဘီ၌ (၄)ဂိုးသွင်းယူနိုင်ခဲ့ခြင်းမှာမူ ၎င်း၏လက်ထက်တွင် ပထမဆုံးအကြိမ်ဖြစ်ကြောင်းလည်း သိရသည်။
ဂွါဒီယိုလာသည် ပြိုင်ပွဲစုံ၌ မန်ချက်စတာဒါဘီပွဲစုစုပေါင်း (၁၆)ပွဲ ယှဉ်ပြိုင်ခဲ့ရာတွင် (၈)ပွဲနိုင်၊ (၂)ပွဲသရေ၊ (၆)ပွဲရှုံးခဲ့သည်။
ယခုပွဲမတိုင်မီတွင် မန်ယူအသင်းကို အများဆုံး(၃)ဂိုးသာ သွင်းယူနိုင်ခဲ့ပြီး စုစုပေါင်း(၁၅)ပွဲ၌ (၁၉)ဂိုးသာ သွင်းယူနိုင်ခဲ့သည်။
