ဘာစီလိုနာအသင်းသည် ဘရာဇီးလ်ကလပ် အက်သလက်တီကိုပါရာ နန်စီအသင်းမှ အသက် (၁၈)နှစ်အရွယ် ဘရာဇီးလ်လက်ရွေးစင်တိုက်စစ်မှူး ဗစ်တာရိုကေးအားခေါ်ယူရန်အပြီး သတ်သဘောတူညီမှုရခဲ့ပြီဖြစ်ပြီး ပြောင်းရွှေ့ကြေး ယူရို (၃၅)သန်း+ Add-ons (၁၀)သန်းပေးချေသွားမည်ဖြစ်ကြောင်း နာမည်ကျော်အား ကစားသတင်းထောက် ဖာဘရီဇီယိုရိုမာနိုကဖော်ပြခဲ့သည်။
ဘာစီလိုနာအသင်းသည် ရိုကေးအားခေါ်ယူရန်အတွက် ပြီးခဲ့သည့် ဇွန်လအစောပိုင်းကတည်းက သဘောတူညီမှုရယူနိုင်ခဲ့ခြင်းဖြစ်ပြီး ယခုအခါ နောက်ဆုံးအဆင့်အပြီးသတ်ဆွေးနွေးမှုများကို ပြုလုပ်နိုင်ခဲ့ခြင်းဖြစ်သည်။
အက်သလက်တီကိုမင်နဲရိုးနှင့် ခရူဇီယိုအသင်းအကယ်ဒမီများတွင်ကစားခဲ့သည့် ရိုကေးသည် ၂၀၂၂ ခုနှစ်ဧပြီလအတွင်းက ပါရာနန်စီအသင်းသို့ ပြောင်းရွှေ့ခဲ့ပြီး အသင်းအတွက်ပြိုင်ပွဲစုံ (၅၇)ပွဲကစားရာတွင် (၁၆)ဂိုးသွင်း ယူပေးထားနိုင်ခဲ့သည်။
ရိုကေးသည် ပါရာနန်စီအသင်းသမိုင်းတစ်လျှောက် ပြောင်းရွှေ့ကြေးအများဆုံးရရှိသည့် ကစားသမားအဖြစ် မှတ်တမ်းဝင်ခဲ့သလို ဘရာဇီးလ်စီးရီးအေမှ ဥရောပထိပ်တန်းလိဂ်သို့ ပြောင်းရွှေ့သူများထဲတွင်လည်း ဒုတိယမြောက်ကြေးအကြီးကစားသမားအဖြစ် ရပ်တည်နိုင်ခဲ့သည်။
ဘရာဇီးလ်လက်ရွေးစင်အသင်းအတွက် နိုင်ငံတကာပွဲ (၁)ပွဲပါဝင် ကစားပေးထားသူ ရိုကေးသည် ဥရောပအသင်းကြီးအများအပြား၏ စိတ်ဝင်စားခြင်းကိုခံနေရသော်လည်း ဘာစီလိုနာအသင်းက အလျင်အမြန်လက်ဦးမှု ရယူနိုင်ခဲ့ခြင်းဖြစ်သည်။
ဘာစီလိုနာအသင်းသည် ရိုကေးအား ယခုနွေရာသီတွင်ခေါ်ယူပြီးနောက် အသင်းနှင့်ချက်ချင်းပူးပေါင်း စေရန်ဆန္ဒရှိနေကြောင်းသိရသည်။ အစောပိုင်းသတင်းများအရ ရိုကေးသည် ၂၀၂၃ ဘရာဇီးလ်စီးရီးအေပြိုင် ပွဲပြီးဆုံးပြီးမှ ဘာစီလိုနာနှင့်ပူးပေါင်း ရန်စီစဉ်ထားပြီး ဘာစီလိုနာနည်းပြ ဇာဗီကမူ အသင်းနှင့် ချက်ချင်းပူးပေါင်းနိုင်စေရန် တောင်ဆိုထားကြောင်း စပိန်မီဒီယာများက ဖော်ပြခဲ့ကြသည်။
