ရီးယဲလ်တိုက်စစ်မှူး ဘန်ဇီမာက ပြင်သစ်လက်ရွေးစင်အသင်းဖော် ဘာပေသည် ရီးယဲလ်အသင်းအတွက် တစ်ချိန်ချိန်တွင် ကစားမည်မှာ သေချာသည်ဟု ပြောကြားခဲ့သည်။
ရီးယဲလ်အသင်းသည် ပြီးခဲ့သည့်နွေရာသီအပြောင်းအရွှေ့စျေးကွက်တွင် ဘာပေကို ခေါ်ယူရန် ယူရိုသန်း (၁၆၀)ဖြင့် ကမ်းလှမ်းခဲ့ရာ ပယ်ချခဲ့သလို၊ ယူရိုသန်း (၂၀၀)ဖြင့် ထပ်မံကမ်းလှမ်းခဲ့သော်လည်း PSG အသင်းက လက်မခံခဲ့ကြောင်း သိရသည်။
သို့သော် PSG အသင်းနှင့် ပြင်သစ်တိုက်စစ်မှူး ဘာပေ (၂၂ နှစ်)၏ လက်ရှိစာချုပ်မှာ ၂၀၂၂ ဇွန်လ (၃၀)ရက်တွင် ကုန်ဆုံးမည်ဖြစ်ပြီး ဘာပေအနေဖြင့် PSG အသင်းနှင့် စာချုပ်သက်တမ်းတိုးခြင်းမရှိပါက လာမည့် ၂၀၂၂ နွေရာသီတွင် ပြောင်းရွှေ့ကြေးအလွတ်ဖြင့် အသင်းပြောင်းရွှေ့နိုင်မည်ဖြစ်သည်။
ဘန်ဇီမာက “သူက ရီးယဲလ်အသင်းရဲ့ ကစားသမားဖြစ်လာမှာ သေချာပါတယ်။ ဘယ် တော့ဖြစ်လာမလဲဆိုတာမသိပေမဲ့ တစ်ချိန်ချိန်မှာ ရီးယဲလ်အတွက် ကစားမှာပါ။ ကျွန်တော်က တော့ သူနဲ့အတူ မက်ဒရစ်မှာ ကစားခွင့်ရချင်ပါတယ်။ သူက အနာဂတ်မှာ ရီးယဲလ်ကစားသမား ဖြစ်လာဖို့ လိုအပ်တဲ့အရည်အသွေးအားလုံး ပိုင်ဆိုင်ထားသူပါ”ဟု ပြောကြားခဲ့သည်။
ဘာပေသည် လာမည့် ၂၀၂၂-၂၃ ရာသီတွင် ရီးယဲလ်သို့ ပြောင်းရွှေ့မည်ဟု ထင်ကြေးပေးခံထားရသူဖြစ်သည်။
