ချန်ပီယံလိဂ်ပြိုင်ပွဲမှ အက်သလက်တီကိုအသင်းထွက်ခွာရပြီးနောက် အသင်းတိုက်စစ်ကစားသမား ဂျော်အိုဖေးလစ်သည် အသင်းမှထွက်ခွာရန် ဆန္ဒရှိလာကြောင်း သိရသည်။
ဂျော်အိုဖေးလစ်သည် အသင်းစံချိန်တင်ပြောင်းရွှေ့ကြေးဖြင့် အက်သလက်တီကိုအသင်းထံ ရောက်ရှိလာသော်လည်း မျှော်မှန်းထားသလောက် ခြေစွမ်းမပြနိုင်ဘဲ လက်ရှိတွင် နည်းပြ ဆီမြွန်နီနှင့် ဆက်ဆံရေး တင်မာနေသည်ဟု သတင်းများ ထွက်ပေါ်နေသည်။
အသက် (၂၂) နှစ်အရွယ်ရှိ ပေါ်တူဂီလက်ရွေးစင်တိုက်စစ်ကစားသမား ဂျော်အိုဖေးလစ်သည် ယခုရာသီ ပြိုင်ပွဲစုံ (၁၆) ပွဲကစားခွင့်ရထားသော်လည်း ပွဲအများစုမှာ လူစားဝင်အဖြစ်သာ ကစားခဲ့ရခြင်းဖြစ်ပြီး (၂) ဂိုး သွင်းယူထားနိုင်သေးသည်။
ထို့ကြောင့် ၎င်းသည် အက်သလက်တီကိုအသင်းမှ ထွက်ခွာရန် ဆန္ဒရှိနေပြီး အက်သလက်တီကိုအသင်းတာဝန်ရှိသူများကမူ အသင်းနှင့် ၂၀၂၆ ခုနှစ်အထိ စာချုပ်သက်တမ်းရှိနေသည့် ၎င်းကို ဆက်ထိန်းရန် ဆန္ဒရှိနေကြောင်း သိရသည်။
လက်ရှိအချိန်တွင် ဂျော်အိုဖေးလစ်ကို ခေါ်ယူရန် မန်ယူအသင်းအပါအဝင် ဥရောပထိပ်သီးအသင်းအချို့ စိတ်ဝင်စားနေကြောင်း သိရသည်။
