အာဂျင်တီးနားအသင်းခေါင်းဆောင် တိုက်စစ်မှူး မက်ဆီသည် ကြာသပတေးနေ့က သြစတြေးလျအသင်းနှင့် ယှဉ်ပြိုင်ကစားခဲ့သည့် ခြေစမ်းပွဲတွင် ကစားသမားဘဝ အမြန်ဆုံးဂိုုးကို သွင်းယူနိုင်ခဲ့ကြောင်း သိရသည်။
မက်ဆီသည် ပွဲအစ(၇၉)စက္ကန့်မှာပင် အာဂျင်တီးနားအသင်းအတွက် အဖွင့်ဂိုးကို အဝေးကန်ချက်ဖြင့် သွင်းယူခဲ့ခြင်းဖြစ်သည်။
မက်ဆီ(၃၅ နှစ်)သည် အာဂျင်တီးနားအသင်းအတွက် (၁၀၃)ဂိုးမြောက် သွင်းယူနိုင်ခဲ့ခြင်းဖြစ်ပြီး ကလပ်အသင်းကစားသမားဘဝ၌ ပြိုင်ပွဲစုံ(၇၁၅)ဂိုး သွင်းယူထားနိုင်သူ ဖြစ်သော်လည်း ၎င်း၏ ပရော်ဖက်ရှင်နယ်ကစားသမားဘဝတွင် ယခုဂိုးမှာ အမြန်ဆုံးဖြစ်ကြောင်း တောင်အမေရိကဘောလုံးအဖွဲ့ချုပ် (COMMEBOL) က ဖော်ပြခဲ့သည်။
မက်ဆီအနေဖြင့် ယခင်သွင်းယူခဲ့သည့်ဂိုးများထက် ပိုစောစွာသွင်းယူနိုင်ခဲ့သော်လည်း တစ်မိနစ်အတွင်း သွင်းယူနိုင်သည့်ဂိုး မရှိသေးကြောင်းလည်း သိရသည်။
မက်ဆီသည် ၂၀၂၂ ကမ္ဘာ့ဖလားပြိုင်ပွဲမှ စတွက်လျှင် အာဂျင်တီးနားအသင်းအတွက် နောက်ဆုံးယှဉ်ပြိုင်ကစားခဲ့သည့် (၁၀)ပွဲတွင် (၁၂)ဂိုးအထိ သွင်းယူနိုင်ခဲ့ကြောင်း သိရသည်။
အာဂျင်တီးနားအသင်းသည် ဇွန်(၁၉)တွင် အင်ဒိုနီးရှားနှင့် ခြေစမ်းမည်ဖြစ်သည်။
