ကစားသမား၏အသက်အရွယ်အား ဂရုစိုက်မည်မဟုတ်ဟု ကိုးမန်း ဆိုခဲ့ပြီး ဘာစီလိုနာအသင်းအတွက် ကြယ်ပွင့်မျိုးဆက်အစုအဖွဲ့ဖန်တီးရန် ရည်ရွယ်နေ

ဘာစီလိုနာအသင်းနည်းပြ ရော်နယ်လ်ကိုးမန်းက မိမိအနေဖြင့် ကစားသမားများ၏ အသက်အရွယ်အား ဂရုစိုက်နေမည်မဟုတ်ဘဲ ကစားသမား၏လုပ်နိုင်စွမ်းနှင့် မိမိ၏အမြင်ကိုသာ ဂရုစိုက်သွားမည်ဖြစ်ကြောင်း ပြောကြားခဲ့သည်။

ပြီးခဲ့သည့်နွေရာသီက ဘာစီလိုနာအသင်းအား စတင်တာဝန်ယူခဲ့သည့် ဒတ်ချ်လူမျိုးနည်းပြ ရော်နယ်လ်ကိုးမန်းအနေဖြင့် ရာသီအစပိုင်းကာလများတွင် ရလဒ်ဆိုးများနှင့်အတူ ဖိအားများနှင့်ရင်ဆိုင်ခဲ့ရသော်လည်း လက်ရှိအချိန်တွင်မူ လူငယ်ကြယ်ပွင့်များအား နေရာပေးခြင်းနှင့် ဆုဖလားများအား ပြန်လည်မျှော်လင့်လာနိုင်ခြင်းတို့ကြောင့် ပရိသတ်များ၏ချီးကျူးမှုကို ခံနေရသူဖြစ်သည်။

ကိုးမန်းသည် ယခုရာသီတွင် ဘာစီလိုနာအသင်း ဒဏ်ရာပြဿနာများနှင့်ရင်ဆိုင်ရချိန်၌ အသင်း၏ လာမာစီယာအကယ်ဒမီထွက် လူငယ်ကစားသမားများအား နေရာပေးကာ ခြေစွမ်းပြနိုင်ရန် စီမံနိုင်ခဲ့ခြင်းဖြစ်ပြီး ၎င်းလက်ထက်တွင် ဘာစီလိုနာအသင်း၏ အနာဂတ်လာမာစီယာမျိုးဆက်အစုအဖွဲ့တစ်ခု ထွက်ပေါ်လာဖွယ်ရှိကြောင်း စပိန်မီဒီယာများက ဖော်ပြခဲ့ကြသည်။

အိုဆာဆူနာအသင်းအား (၂-၀)ဂိုးဖြင့် အနိုင်ရသော လာလီဂါပွဲစဉ်တွင် အသင်း၏အကယ်ဒမီထွက် ကစားသမားတစ်ဦးဖြစ်သည့် ကွင်းလယ်လူ ကူရူမာမှာ ပထမဆုံးဂိုးကို သွင်းယူနိုင်ခဲ့သလို၊ ယင်းပွဲတွင် လာမာစီယာအကယ်ဒမီထွက် လူငယ်ကစားသမားများဖြစ်သည့် နောက်ခံလူ မင်ဂွယ်ဇာ၊ ကွင်းလယ်လူ ရီကီပွတ်ချ်တို့မှာလည်း ပွဲကစားခွင့်များ ရရှိခဲ့သည်။

ယခုရာသီ ဘာစီလိုနာအသင်းကြီးတွင် ပွဲကစားခွင့်ရရှိထားသည့် အသက် (၂၁)နှစ်အောက် လာမာစီယာအကယ်ဒမီထွက် ကစားသမားအရေအတွက်မှာ (၆)ဦး အထိရှိနေပြီး ယင်းအထဲမှ နောက်ခံလူ အာရူဟို၊ မင်ဂွယ်ဇာ၊ ကွင်းလယ်လူ ရီကီပွတ်ချ်တို့မှာ ပြိုင် ပွဲစုံ (၁၈)ပွဲနှင့်အထက် ကစားထားသူများဖြစ်သည်။

ထို့ပြင် ဒဏ်ရာကြောင့် ကာလရှည်အနားယူနေရသည့် ကြယ်ပွင့်တိုက်စစ်မှူး အန်ဆူဖာတီမှာလည်း မက်ဆီအလွန် ဘာစီလိုနာ၏တိုက်စစ်အနာဂတ်အဖြစ် သတ်မှတ်ခံထားရသူဖြစ်သည်။

ထို့ပြင် ဆာဂျီညိုဒက်စ်၊ ပယ်ဒရီ၊ ထရင်ချာအိုတို့ကဲ့သို့ အသင်း၏ အဓိကကစားသမားများအဖြစ် ကစားခွင့်ရနေသည့် လူငယ်ကြယ်ပွင့်ကစားသမားများလည်းရှိနေရာ ကိုးမန်း၏ လူငယ်ကစားသမားများအပေါ် စီမံခန့်ခွဲမှုမှာ ချီးကျူးစရာဖြစ်ကြောင်း စပိန်မီဒီယာများ က ဖော်ပြခဲ့ကြသည်။

လူငယ်ကစားသမားများ၏ အရည်အသွေး၊ မျှော်လင့်ချက်များနှင့်ပတ်သက်၍ ကိုးမန်းက ”သူတို့ (လူငယ်ကစားသမားများ)အားလုံး ကျော်ဖြတ်ယူဆောင်လာခဲ့တဲ့ ကောင်းခြင်းတွေနဲ့ပတ်သက်ပြီး ကျွန်တော်တို့အားလုံး အမှန်တကယ် ဂုဏ်ယူရပါတယ်။ လူတွေဟာ ပတ်ဒရီ၊ ကူရူမာ၊ ရီကီပွတ်ချ်၊ မင်ဂွယ်ဇာ၊ အာရူဟိုတို့ကို နှစ်သက်နေပြီး သူတို့ကလည်း ကြီးမားခမ်းနားတဲ့ အနာဂတ်တွေရှိကြောင်းကို ပြသနေပါတယ်။ နည်းပြတစ်ဦးအနေနဲ့တော့ ကျွန်တော်ဟာ အမြဲတမ်းလူငယ်ကစားသမားတွေကို အခွင့်အရေးပေးသွားမှာပါ။ ဘာကြောင့်လဲဆိုရင်တော့ သူတို့ဟာ အသင်းရဲ့အနာဂတ်ဖြစ်လို့ပါပဲ။ ကျွန်တော်ကတော့ ကစားသမားတစ်ဦးရဲ့အသက်အရွယ်ကို ဂရုစိုက်မှာမဟုတ်ဘဲ၊ သူတို့ ကွင်းထဲမှာ ဘာလုပ်နိုင်လဲဆိုတာနဲ့ ကျွန်တော့်အမြင်ကိုပဲ ဂရုစိုက် သွားမှာပါ”ဟု ပြောကြားခဲ့သည်။