မန်ယူအသင်း၏ ချန်ပီယံလိဂ်လူစာရင်းမှ ချန်လှပ်ခံခဲ့ရသည့် နယ်သာလန်ကွင်းလယ်ကစားသမား ဗန်ဒယ်ဘိခ်သည် ယခုလအတွင်း အသင်းမှထွက်ခွာဖွယ်ရှိနေကြောင်း ဗြိတိန်သတင်းစာ Daily Mail က ဖော်ပြခဲ့သည်။
မန်ယူအသင်းသည် စက်တင်ဘာ (၅)ရက်က ချန်ပီယံလိဂ်ယှဉ်ပြိုင်မည့် အသင်းလူစာရင်းကို ထုတ်ပြန်ခဲ့ရာ တန်ဟက်ဂ်နှင့် ဆက်ဆံရေးအဆင်မပြေဖြစ်နေသည့် သတင်းထွက်နေသည့် တောင်ပံကစားသမား ဆန်ချို ပါဝင်လာခဲ့သော်လည်း ဗန်ဒယ်ဘိခ် ချန်လှပ်ခံခဲ့ရသည်။
၂၀၂၀ တွင် အေဂျက်စ်အသင်းမှ မန်ယူအသင်းထံသို့ ပေါင်သန်း(၄၀) ဖြင့် ပြောင်းရွှေ့လာခဲ့သည့် အသက် (၂၆) နှစ်အရွယ်ရှိ ဗန်ဒယ်ဘိခ်သည် မန်ယူအသင်းတွင် ခြေစွမ်းပြနိုင်ရန် ရုန်းကန်နေရသူဖြစ်သည်။
၎င်းသည် ယခုရာသီ မန်ယူအသင်း၏ ပရီးမီးယားလိဂ်ပွဲစဉ် များတွင် အသင်းလူစာရင်း၌ပင် ပါဝင်ခြင်းမရှိကြောင်း သိရှိရသည်။ ဗန်ဒယ်ဘိခ်အနေဖြင့် နွေရာသီအပြောင်းအရွှေ့ဈေးကွက်နောက်ဆုံးနေ့တွင် လော်ရီယန့်အသင်းထံ ပြောင်းရွှေ့ရန် နီးစပ်ခဲ့သော်လည်း ပျက်ပြယ်ခဲ့ရကြောင်း သိရသည်။
လက်ရှိတွင် ဗန်ဒယ်ဘိခ်အား ခေါ်ယူရန် တူရကီကလပ် ဂါလာတာစာရေးအသင်းက စိတ်ဝင်စားနေကြောင်း သိရှိရသည်။ ဥရောပထိပ်တန်းလိဂ် (၅) ခု၏အပြောင်းအရွှေ့ဈေးကွက်မှာ ပိတ်သိမ်းခဲ့ပြီဖြစ်သော်လည်း တူရကီလိဂ် အပြောင်းအရွှေ့ဈေးကွက်မှာမူ စက်တင်ဘာ (၁၁)ရက်တွင်မှ ပိတ်သိမ်းမည်ဖြစ်ကြောင်း သိရှိရသည်။
