ယခုနွေရာသီအပြောင်းအရွှေ့ စျေးကွက်တွင် ဥရောပမှ နာမည်ကျော်ကစားသမားများကို ခေါ်ယူမှုများ ဆက်တိုက်ပြုလုပ်နေသည့် ဆော်ဒီလိဂ်သည် ချယ်လ်ဆီးအသင်းမှ ကစားသမားများကို ခေါ်ယူရန် ပစ်မှတ်ထားနေပြီး လန်ဒန်မြို့တွင်ပင် ရောက်ရှိလှုပ်ရှားနေကြောင်း Daily Mail သတင်းစာက ဖော်ပြခဲ့သည်။
ချယ်လ်ဆီးအသင်းသည် ပြီးခဲ့သည့်နှစ်တွင် အသင်းပိုင်ရှင်အပြောင်းအလဲဖြစ်ပေါ်ခဲ့သည့်အတွက် အသင်းကို ပြောင်းလဲမှုများစွာ လုပ်ဆောင်ခဲ့ပြီး ကစားသမားသစ်များစွာ ခေါ်ယူအားဖြည့်ခဲ့သည်။ သို့သော် အောင်မြင်မှုမရှိခဲ့သည့်အတွက် ယခု နွေရာသီတွင် နည်းပြအပြောင်းအလဲ ပြုလုပ်ထားသလို၊ ကစားသမားများကိုလည်း အပြောင်းအလဲများစွာ ထပ်မံပြုလုပ်ရန် စီစဉ်နေသည်။
ချယ်လ်ဆီးအသင်းသည် နည်းပြသစ် ပိုချက်တီနို လိုလားခြင်းမရှိသည့် ကစားသမားများကို ရောင်းထုတ်မည်ဖြစ်သည့်အတွက် ဆော်ဒီလိဂ်မှ ကလပ်အသင်းများက အဆိုပါကစားသမားများကို ခေါ်ယူရန် ပစ်မှတ်ထားလာခြင်းဖြစ်ကြောင်း သိရသည်။
လက်ရှိအချိန်တွင် ဆော်ဒီကလပ်အသင်းများမှ တာဝန်ရှိသူများသည် လန်ဒန်မြို့ရှိ ကြယ်ငါးပွင့်အဆင့် ဟိုတယ်များတွင်ပင် ရောက်ရှိနေပြီဖြစ်ပြီး ချယ်လ်ဆီးကစားသမားများကို လက်ဦးမှုရယူနိုင်ရန် ကြိုးပမ်းနေကြောင်း Daily Mail က ဖော်ပြခဲ့သည်။
၎င်းင်းတို့သည် ချယ်လ်ဆီးအသင်းမှ အူဘာမီယန်း၊ ကူလီဘာလီ၊ လူကာကူ၊ ဇီယာ့ရှ်၊ မန်ဒီ စသည့် ကစားသမား(၅)ဦးကို ကြိုးပမ်းနေခြင်းဖြစ်သည်။
