ချယ်လ်ဆီးတွင် ရာသီဝက်အငှားလာရောက်ကစားပြီး ခြေစွမ်းမပြနိုင်ခဲ့သည့် အက်သလက်တီကိုတိုက်စစ်မှူး ဂျော်အိုဖေးလစ်ကိုခေါ်ယူရန် မန်ယူအသင်း ဆက်သွယ်

မန်ယူအသင်းသည် ပြီးခဲ့သည့်ရာသီက ချယ်လ်ဆီးအသင်းတွင် ရာသီဝက်အငှားဖြင့် လာရောက်ကစားခဲ့ပြီး ခြေစွမ်းမပြနိုင်ခဲ့သည့် အက်သလက်တီကိုတိုက်စစ်မှူး ဂျော်အို ဖေးလစ်ကို ခေါ်ယူရန်ဆက်သွယ်ခဲ့ကြောင်း Daily Express သတင်းစာက ဖော်ပြခဲ့သည်။ 

အသက် (၂၃) နှစ်အရွယ်ရှိ ဂျော်အိုဖေးလစ်သည် ပြီးခဲ့သည့် ဇန်နဝါရီအပြောင်းအရွှေ့ကာလတွင် ချယ်လ်ဆီးအသင်းထံ ရာသီဝက်အငှားဖြင့် လာရောက်ကစားခဲ့သည်။ သို့ သော် ဂျော်အိုဖေးလစ်သည် ချယ်လ်ဆီးအသင်းတွင် ခြေစွမ်းပြနိုင်ရန် ရုန်းကန်ခဲ့ရပြီး ပြိုင်ပွဲစုံ ပွဲ (၂၀) တွင် (၅) ဂိုးသာ သွင်းယူနိုင်ခဲ့သည်။ သို့သော် ၎င်းကိုခေါ်ယူရန် ပရီးမီးယားလိဂ်ကလပ်များဖြစ်သည့် မန်ယူနှင့် အက်စတွန်ဗီလာအသင်းတို့က အပြိုင်စိတ်ဝင်စားနေကြကြောင်း သိရှိရသည်။ 

မန်ယူအသင်းသည် စီရော်နယ်လ်ဒိုနှင့် လမ်းခွဲပြီး နောက် ပြီးခဲ့သည့်ဇန်နဝါရီအပြောင်းအရွှေ့ကာလတွင် ဂျော်အိုဖေးလစ်ကို ခေါ်ယူရန် ကြိုးပမ်းခဲ့ဖူးသည်။ သို့သော် ထိုစဉ်က ချယ်လ်ဆီးအသင်းက ဂျော်အိုဖေးလစ်ကို ရာသီဝက်အငှားခေါ်ယူသွားသဖြင့် မန်ယူအသင်းသည် ၎င်းကို လက်လျှော့ကာ ဗက်ဟော့စ်အား ရာသီဝက်အငှားဖြင့် ခေါ်ယူခဲ့ခြင်းဖြစ်သည်။ 

မန်ယူအသင်းသည် ယခုနွေရာသီတွင် ထိပ်တန်းတိုက်စစ်မှူးတစ်ဦး ခေါ်ယူရန် အသည်းအသန်ကြိုးပမ်းနေပြီး စပါးတိုက်စစ်မှူး ဟာရီကိန်းအား နံပါတ် (၁) ပစ်မှတ်ထား ခေါ်ယူရန် ကြိုးပမ်းခဲ့သော်လည်း ကြေးကြီးမှုကြောင့် လက်လျှော့ခဲ့ရကြောင်း သိရှိရသည်။ ယင်းနောက် မန်ယူအသင်းသည် အတ္တလန်တာတိုက်စစ်မှူး ဟွိုင်လန်းကို ခေါ်ယူရန်ပစ်မှတ်နေထားပြီး ယခုအခါ ဂျော်အိုဖေးလစ်ကို ခေါ်ယူရန် ဆက်သွယ်လာခြင်းဖြစ်ကြောင်း Daily Express က ဖော်ပြခဲ့သည်။ 

အက်သလက်တီကိုနည်းပြ ဆီမြွန်နီသည် ဂျော်အိုဖေးလစ်အား သဘောကျခြင်းမရှိဘဲ ၎င်းဝတ်ဆင်သည့် ကျောနံပါတ် (၇) အား ဂရီးဇ်မန်းအား ပေးအပ်ခဲ့ရာ ဂျော်အိုဖေးလစ်အနေဖြင့် ယခုနွေတွင် အက်သလက်တီကိုမှ ထွက်ခွာရဖွယ်ရှိနေပြီး မန်ယူအသင်းက ၎င်းကိုခေါ်ယူရန် ကြိုးပမ်းလာခြင်းဖြစ်သည်။