ချယ်လ်ဆီးအသင်း၏ ပရီးမီးယားလိဂ်ချန်ပီယံအလေးပေးချက် များစွာမြင့်တက်လာပြီး ထိပ်ဆုံးမှ လက်ရှိချန်ပီယံ မန်စီးတီးနှင့် ပိုမိုနီးကပ်လာနေ

စက်တင်ဘာ ၁၉ ရက်က ယှဉ်ပြိုင်ကစား ခဲ့သည့် ပရီးမီးယားလိဂ်အဝေးကွင်းပွဲစဉ်တွင် မြို့ခံပြိုင်ဘက် စပါးအသင်းအား ဂိုးပြတ်အနိုင်ရခဲ့ပြီးနောက် အမှတ်ပေးချန်ပီယံရေပန်းစားမှုတွင် ချယ်လ်ဆီးအသင်း၏အလေးပေးချက်မှာ များစွာမြင့်တက်လာပြီး ထိပ်ဆုံးမှ လက်ရှိချန်ပီယံ မန်စီးတီးအသင်းနှင့်ပင် ကွာဟခြင်းသိပ်မရှိတော့ကြောင်း သိရသည်။

ပရီးမီးယားလိဂ်ပြိုင်ပွဲ ရာသီသစ်မစတင်မီ ချန်ပီယံအလေးပေးချက်တွင် Bet365 ၏ ထုတ်ပြန်မှု၌ ချယ်လ်ဆီးအသင်းက လီဗာ ပူးလ်နှင့်အတူ ၅း၁ လေးဖြင့် ဒုတိယနေရာ တွင်ရှိခဲ့ပြီး မန်စီးတီးအသင်းက ၄း၆ လေးဖြင့် ထိပ်ဆုံး၌ရှိခဲ့ကာ ရေပန်းစားမှုမှာ ကွာဟခဲ့သည်။

သို့သော် ရာသီအဖွင့်ပွဲစဉ် ငါးပွဲအ ပြီးတွင် ချယ်လ်ဆီးအသင်းသည် ပြိုင်ဘက် လီဗာပူးလ်ကို အဝေးကွင်း၌ တစ်ယောက် လျော့ဖြင့် သရေကစားနိုင်ခြင်း၊ မြို့ခံပြိုင်ဘက် အသင်းများဖြစ်သည့် အာဆင်နယ်၊ စပါးအသင်းများကို အဝေးကွင်း၌ ဂိုးပြတ်အနိုင်ကစားခဲ့ခြင်းများကြောင့် အလေးပေးချက် များစွာမြင့်တက်ခဲ့သည်။

Bet365 မှ နောက်ဆုံး ထုတ်ပြန်ထားသည့် ချန်ပီယံအလေးပေးချက် တွင် ချယ်လ်ဆီးအသင်းသည် ၂း၁ လေးအထိ ရောက်ရှိလာပြီး ထိပ်ဆုံးမှ မန်စီးတီးအသင်း(၁၅း၈ လေး)နှင့် ကွာဟမှုပင် သိပ်မရှိ တော့ကြောင်း သိရသည်။ ပရီးမီးယားလိဂ် အမှတ်ပေးဇယား၌ ချယ်လ်ဆီးအသင်းနှင့် ရမှတ်တူ၊ ဂိုးကွာခြားချက်တူ၊ သွင်းဂိုးတူဖြင့် ရပ်တည်နေသည့် လီဗာပူးလ်အသင်းမှာ လည်း အလေးပေးချက် အနည်းငယ်မြင့်တက် ခဲ့ပြီး ရာသီမစတင်မီ ၅း၁ လေးသာ ရှိခဲ့ရာမှ ယခုအချိန်တွင် ရး၂ လေးအထိ ရောက်ရှိလာခဲ့သည်။

ချယ်လ်ဆီး၊ လီဗာပူးလ်အသင်းများ နှင့် အမှတ်တူရပ်တည်နေသည့် မန်ချက်စတာယူနိုက်တက်အသင်းမှာလည်း ရေပန်းစားမှုမြင့်တက်ခဲ့ပြီး ရာသီမစမီက ၈း၁ လေးသာရှိရာမှ လက်ရှိ တွင် ၁၁း၂ လေးသို့ ရောက်ရှိခဲ့သည်။ ထိပ်ဆုံး လေးသင်းနှင့် ကျန်အသင်းများအကြား ရေပန်းစားမှုကွာဟချက်မှာ ရာသီမစတင်မီကထက် ပိုမိုများပြားလာကြောင်း သိရသည်။