မန်ယူနည်းပြ တန်ဟက်ဂ်က ချာလ်တန်အသင်းကို (၃-ဝ)ဂိုးဖြင့် အနိုင်ရခဲ့သော်လည်း မိမိတို့အသင်း၏တိုက်စစ်မှာ အဆုံးသတ်ပိုင်း အားနည်းသေးကြောင်း ပွဲအပြီးတွင် ဝန်ခံပြောကြားခဲ့သည်။
ဒီဇင်ဘာ (၁၀)ရက်(အင်္ဂါနေ့) က ကစားခဲ့သည့် လိဂ်ဖလားကွာတားဖိုင်နယ်ပွဲစဉ်တွင် မန်ယူအသင်းသည် League One ကလပ် ချာလ်တန်အသင်းကို (၃-ဝ)ဂိုးဖြင့် အနိုင်ရခဲ့သည်။
ဂိုးပေါက်ကန်သွင်းမှု (၂၁)ကြိမ်အထိ ရရှိခဲ့သော်လည်း ပထမပိုင်း၌ ပွဲချိန် (၂၁)မိနစ်တွင် သွင်းယူခဲ့သည့် အန်တိုနီ၏ တစ်လုံးတည်းသောဂိုးဖြင့်သာ ဦးဆောင်နိုင်ခဲ့သည်။ ယင်းနောက် ဒုတိယပိုင်းတွင် ရပ်ရှ်ဖို့ဒ်က ပွဲချိန်မိနစ် (၉၀)နှင့် (၉၀+၄)မိနစ်တို့တွင် သွင်းယူခဲ့ခြင်းဖြစ်သည်။
ထို့ကြောင့် မန်ယူနည်းပြ တန်ဟက်ဂ်က ချာလ်တန်အသင်းကို ဂိုးပြတ်အနိုင်ရခဲ့သည့်အတွက် ဝမ်းသာသော်လည်း အသင်းတိုက်စစ်မှာ အဆုံးသတ်ပိုင်းအားနည်းကြောင်း ပြော ကြားခဲ့ခြင်းဖြစ်သည်။ “အသင်းရဲ့ တိုက်စစ်က အဆုံးသတ်ပိုင်း အားနည်းပါတယ်။ ကျွန်တော်တို့အနေနဲ့ ပထမပိုင်းမှာ ဂိုးရနိုင်တဲ့အခွင့်အရေးများစွာ ဖန်တီးနိုင်ခဲ့ပေမဲ့ ထိထိရောက်ရောက် အသုံးမချနိုင်ခဲ့ပါဘူး။ ကျွန်တော်တို့အနေနဲ့ ပထမပိုင်းမှာက တည်းက ပွဲကို အဆုံးသတ်ခဲ့သင့်တာပါ။ ရလဒ်အတွက်တော့ ဝမ်းသာပါတယ်” ဟု ပြောကြားခဲ့သည်။
