အင်္ဂလန်ကွင်းလယ်ကစားသမားဟောင်း အိုဝင်ဟားဂရိဗ်က ချဲလ်ဆီးအသင်းသည် ချန်ပီယံလိဂ်တွင် နောက်တစ်ဆင့် တက်နိုင်ရန် အလားအလာရှိနေသေးကြောင်း အပြောင်းအရွှေ့အတွက်ပေါင်သန်း ၆၀၀ ခန့်အသုံးပြုထားသော်လည်း ချဲလ်ဆီးတွင် တိုက်စစ်မြှားဦးကစားသမားမရှိခြင်းသည် အံ့အားသင့်စရာ ဖြစ်ကြောင်းလည်း ပြောဆိုလိုက်သည်။
ဗုဒ္ဓဟူးနေ့ညက ကစားသည့်ပွဲတွင် ဒေါ့မွန်သည် ချဲလ်ဆီးကို အိမ်ကွင်းတွင် ၁-၀ ဖြင့်အနိုင်ရရှိခဲ့သည်။ ဒေါ့မွန်အတွက်ဂိုးကို ပွဲချိန် ၆၃ မိနစ်တွင် အဒီယီမီက တကိုယ်တော်ခြေစွမ်းပြပြီးသွင်းယူခဲ့သည်။ ချဲလ်ဆီးသည် ဂိုးသွင်းခွင့်များကို ဖန်တီးနိုင်သော်လည်း ဂိုးမရဖြစ်ခဲ့ရသည်။
“အပြောင်းအရွှေ့မှာ ပေါင်သန်း ၆၀၀ လောက်သုံးထားပြီး တိုက်စစ်မြှားဦးကစားသမားမရှိတာကတော့ ဘယ်လို့ပြောရမှန်းတောင်မသိဘူး။ နောက်ဆုံးတော့ ဒီကိစ္စကပဲ ဒေါ့မွန်နဲ့ပွဲမှာ အဖြေပေးသွားတယ်။ ချဲလ်ဆီးမှာ ဂိုးသွင်းမယ့်သူတစ်ဦးလိုအပ်နေတယ်။ ပွဲကပြီးသွားပြီလို့ ပြောဖို့ အဝေးကြီးလိုနေပါသေးတယ်။”
“ချဲလ်ဆီးက ဒုတိယအကျော့စတမ်းဖို့ဘရစ်ချ်မှာ အသာလေးအနိုင်ရနိုင်ပါတယ်။ ဒေါ့မွန်ကလည်း အန္တရာယ်ရှိတဲ့အသင်းဆိုတာသေချာပါတယ်။ သူတို့က ဖန်တီးမှုတွေလုပ်နိုင်သလို ခံစစ်ကစားတာလည်း ပိုပြီးကျစ်လျစ်မှုရှိတယ်။ ဒါပေမယ့် ချဲလ်ဆီးက ရှေ့တန်းမှာ ဂိုးသွင်းမယ့်သူတစ်ဦးရှာနိုင်ရင် ဒုတိယအကျော့ကို အသာလေးအနိုင်ရသွားနိုင်တယ်”ဟု ဟားဂရိဗ်က ထုတ်ဖော်ပြောဆိုသည်။
