ရီးယဲလ်မက်ဒရစ်အသင်း၏ ဘယ်လ်ဂျီယံတောင်ပံကစားသမား အီဒင်ဟာဇက်သည် ခြေသလုံး၏ဒဏ်ရာကြောင့် ကြားရက်တွင်ကစားမည့် ဘီလ်ဘာအိုနှင့် လာလီဂါပွဲကျန်ပွဲစဉ်အား လွဲချော်မည်ဖြစ်ကြောင်းသိရသည်။
အသက် (၃၀)နှစ်အရွယ်ရှိ အီဒင်ဟာဇက်သည် ဒဏ်ရာပြဿနာများနှင့် ကာလရှည်ရုန်းကန်နေရသူဖြစ်ပြီး ရီးယဲလ်အသင်းတွင်ကစားခဲ့သည့် ပြီးခဲ့သည့် (၂)ရာသီအတွင်း ဒဏ်ရာကြောင့် ရက်ပေါင်း (၄၀၀)ကျော်အနားယူခဲ့ရသလို ယခုရာသီတွင်လည်းလာလီဂါ (၁၀)ပွဲတွင် မိနစ် (၃၅၀)သာ ကစားခွင့်ရထားသူဖြစ်သည်။
ဟာဇက်အနေဖြင့် ဒဏ်ရာပြဿနာများနှင့်အတူ ခြေစွမ်းပြနိုင်ရန် ရုန်းကန်နေရခြင်းကြောင့် နည်းပြအန်ဆယ်လော့တီအနေဖြင့် ဟာဇက်အား ပွဲထွက်လူစာရင်းတွင် အသုံးမပြုသည်မှာလည်း အချိန်တစ်ခုကြာမြင့်နေပြီဖြစ်သည်။
လက်ရှိတွင်ဟာဇက်သည် ခြေသလုံးဒဏ်ရာရရှိနေပြီး နိုင်ဝင်ဘာ (၆)ရက်နေ့က ကစားခဲ့သော ဗယ်လက်ကာနိုနှင့် လာလီဂါပွဲစဉ်နောက်ပိုင်း အသင်းအတွက် ပွဲကစားပေးနိုင်ခြင်းမရှိဘဲ ယခုအခါ ဘီလ်ဘာအိုနှင့် ကြားရက်ပွဲစဉ်ကိုပါ လွဲချော်ခဲ့ခြင်းဖြစ်သည်။
နည်းပြအန်ဆယ်လော့တီအနေဖြင့် ဟာဇက်အား ကြံ့ခိုင်မှုပြန်လည်ပြည့်ဝပါက ပွဲကစားရန်အခွင့်အရေးပြန်ပေးနိုင်ကြောင်း ဖွင့်ဟထားသော်လည်း စပိန်မီဒီယာများ၏ ဖော်ပြချက်တွင်မူ အန်ဆယ်လော့တီအနေဖြင့် ဟာဇက်၏အခြေအနေအားစိတ်ပျက်လျက်ရှိနေပြီး လာမည့်ဇန်နဝါရီအပြောင်းအရွှေ့တွင် အသင်းမှထွက်ခွာရန် နီးစပ်နေကြောင်းသိရသည်။
ဟာဇက်သည် ရီးယဲလ်အသင်းအတွက် (၃)ရာသီအတွင်း ပြိုင်ပွဲစုံ (၅၄)ပွဲသာကစားခွင့်ရထားပြီး (၅)ဂိုးသာသွင်းယူထားနိုင်ခဲ့သည်။
