ယခုနွေရာသီတွင် ဥရောပထိပ်တန်းကလပ်များ၏ ပစ်မှတ်ကစားသမားဖြစ်သည့် ခရိုအေးရှားနောက်ခံလူ ဂီဗာဒီယိုလ်နှင့် အေးဂျင့်ဖြစ်သူတို့က မန်စီးတီးအသင်းသို့ ပြောင်းရွှေ့ရန် ဆန္ဒရှိကြောင်း အသင်းထံအသိပေးထားပြီး မန်စီးတီးနှင့်ဆွေးနွေးမှုများ ပြုလုပ်လျက်ရှိကြောင်း လိုက်ပ်ဇစ်အသင်း အားကစားဒါရိုက်တာဖြစ်သူ မက်စ်အီဘာလ်က အတည်ပြုပြောကြားခဲ့သည်။
အသက် (၂၁) နှစ်သာရှိသေးသည့် ခံစစ်အတွင်းလူ ဂီဗာဒီယိုလ်သည် လိုက်ပ်ဇစ်အသင်းတွင် အဓိက ကစားသမားအဖြစ် ကစားနေသလို၊ ၂၀၂၂ ကမ္ဘာ့ဖလားပြိုင်ပွဲ၌ တတိယဆုရရှိခဲ့သည့် ခရိုအေးရှားအသင်းအတွက်လည်း ခြေစွမ်းပြနိုင်ခဲ့သည်။ ချယ်လ်ဆီးနှင့် စပါးအသင်းတို့က ၎င်းအား ပြီးခဲ့သည့်နှစ်ကတည်းက ခေါ်ယူရန် စိတ်ဝင်စားခဲ့သော်လည်း ကစားသမားကိုယ်တိုင်က မန်စီးတီးအသင်း သို့ပြောင်းရွှေ့ရန် ဆန္ဒရှိနေခြင်းဖြစ်သည်။
လိုက်ပ်စ်ဇစ်အသင်းအနေဖြင့် နောက်ခံလူများအတွက် ကမ္ဘာ့ပြောင်းရွှေ့ကြေးအမြင့်ဆုံးအဖြစ် ယူရိုသန်း ၁၀၀ (ပေါင် ၈၆ သန်း) အပြင် Add-ons ကြေးရရှိရန် တောင်းဆိုထားကြောင်းလည်း မက်စ်အီဘာလ်က ပြောကြားခဲ့သည်။
“ယော်စကိုဂီဗာဒီယိုလ်နဲ့ အေးဂျင့်တို့က မန်ချက်စတာစီးတီးကို ပြောင်းရွှေ့ဖို့ သူတို့ဆန္ဒရှိတဲ့အကြောင်း ကျွန်တော်တို့ကို ပြောပြထားတယ်ဆိုတာ အတည်ပြုနိုင်ပါတယ်။ မန်စီးတီးနဲ့ ကျွန်တော်တို့ ဆွေးနွေးနေပါတယ်။ ယူရိုသန်း ၁၀၀ နဲ့ Add-ons ရရှိဖို့အတွက်ပါ။ ယော်စကိုက ပက်(ဂွါဒီယိုလာ)ရဲ့သန်မာတဲ့လက်ထဲ ရောက်သွားမှာပါ။ အဲဒီပမာဏက ဂီဗာဒီယိုလ်ကို သမိုင်းတစ်လျှောက် ကမ္ဘာ့ပြောင်းရွှေ့ကြေးအမြင့်ဆုံး နောက်ခံလူ ဖြစ်လာစေမှာပါ။ အခုအချိန်မှာ ကျွန်တော်ပြောနိုင်တာ ဒါအကုန်ပါပဲ” ဟု ၎င်းင်းက ဒေသတွင်းသတင်းဌာနဖြစ်သည့် Leipziger Volkszeitung သို့ ပြောကြားခဲ့သည်။
မန်စီးတီးအသင်းသည် ယခုနွေရာသီတွင် ခံစစ်အတွင်းလူ လာပေါ့တ်ကို ရောင်းချဖွယ်ရှိသလို ညာနောက်ခံလူ ဝေါ်လ်ကာမှာလည်း အနာဂတ်မတည်မငြိမ်ဖြစ်နေသည်။ လာပေါ့တ် ထွက်ခွာသွားပါက ခံစစ်ပိုင်းကို ပြန်လည်အားဖြည့်ရမည်ဖြစ်ပြီး ဂီဗာဒီယိုလ်မှာ နည်းပြဖြစ်သူ ဂွါဒီယိုလာ၏ စိတ်ကြိုက်ကစားသမားလည်းဖြစ်သည်။ ဂီဗာဒီယိုလ်၏ စာချုပ်လျော်ကြေးမှာ၂၀၂၄ ခုနှစ်တွင် စတင်အသက်ဝင်မည်ဖြစ်ပြီး ပေါင် ၉၇ သန်း (ယူရို ၁၁၃ သန်း) အထိ ပေးချေရနိုင်ကြောင်း သိရသည်။
ဖလားသုံးလုံးချန်ပီယံဆု ကာကွယ်ရမည့် မန်စီးတီးအသင်းသည် ယခုနွေရာသီတွင် ချယ်လ်ဆီးအသင်း၏ ကွင်းလယ်လူ ကိုဗာချစ်ကို ပေါင် (၂၅)သန်းဖြင့် ခေါ်ယူ ထားပြီး စာချုပ်ကုန်ဆုံးသွားသည့် အသင်းခေါင်းဆောင် ဂွန်ဒိုဂန်နှင့် ဘယ်နောက်ခံလူ မန်ဒီကို ထွက်ခွာခွင့်ပြုထားကြောင်း သိရသည်။
