ဘာစီလိုနာအသင်းသည် လက်ရှိအချိန်တွင် ပြိုင်ပွဲစုံ (၁၁)ပွဲဆက် အနိုင်ရရှိထားပြီး နည်းပြဂွါဒီယိုလာလက်ထက် နိုင်ပွဲဆက်စံချိန်ကို လိုက်မီခဲ့ပြီး အကောင်းဆုံးပုံစံရရှိနေသော်လည်း နည်းပြဇာဗီက မန်ယူနှင့်ပွဲမှာ ခက်ခဲသည့်စမ်းသပ်မှုဖြစ်လာမည်ဟု ပြောကြားခဲ့သည်။
ဘာစီလိုနာအသင်းသည် ၂၀၂၃ ခုနှစ်အတွင်း ယှဉ်ပြိုင်ကစားခဲ့သည့် ပြိုင်ပွဲစုံ(၁၁)ပွဲစလုံးကို အနိုင်ရရှိ(အချိန်ပိုနှင့် ပယ်နယ်တီတွင် အနိုင်ရရှိမှုများလည်း ပါဝင်)ခဲ့ပြီး ဂွါဒီယိုလာ လက်ထက် ၂၀၀၈-၀၉ ရာသီက နိုင်ပွဲဆက်စံချိန်ကို လိုက်မီခဲ့ခြင်းဖြစ်သည်။
ဘာစီလိုနာအသင်းသည် လာမည့် ယူရိုပါလိဂ်ပွဲစဉ်တွင် မန်ယူအသင်းကို အနိုင်ရရှိခဲ့ပါက ဇာဗီအနေဖြင့် ဘာစီလိုနာအသင်းအတွက် နိုင်ပွဲဆက်မှုအများဆုံးနည်းပြအဖြစ် စံချိန်သစ်တင်နိုင်မည်ဖြစ်သည်။ သို့သော် ဇာဗီက “ဘာစီလိုနာအသင်းကို ရပ်တန့်လို့ မရတော့ဘူးလို့ ကျွန်တော် ပြောမှာမဟုတ်ပါဘူး။ ဒါပေမဲ့ ကျွန်တော်တို့ ကောင်းမွန်တဲ့ အခိုက်အတန့်ကို ရောက်ရှိနေပြီး ခံစစ်ပိုင်းကလည်း ပြီးပြည့်စုံနေပါ တယ်။ ပွဲရဲ့အရှိန်နဲ့ ဖိအားမြင့်တက်လာချိန်မှာ ဟန်ချက်ညီညီ ကစားနိုင်စွမ်းရှိတာကလည်း အသင်းအတွက် အလွန်အရေးကြီးပါတယ်။ အခုတော့ ကျွန်တော်တို့ အားပြန်မွေးဖို့ လိုအပ်နေပြီး ယူရိုပါလိဂ်အတွက် စိတ်ပိုင်းဆိုင်ရာကို ပြောင်းလဲရမှာပါ။ ပြီးတော့ မန်ယူအသင်းနဲ့ ရင်ဆိုင်ရာမှာ ကျွန်တော်တို့ရဲ့ အကောင်းဆုံးခြေစွမ်းကို ပြသရမှာပါ။ သူတို့ကလည်း တကယ်ကောင်းတဲ့ အခိုက်အတန့်ကို ရောက်နေတာကြောင့် ခက်ခဲတဲ့ စမ်းသပ်မှုဖြစ်လာမှာပါ။ ဒီပွဲစဉ်က အရမ်းခက်ခဲသလို၊ ယူနိုက်တက်ကလည်း အရမ်းခက်ခဲတဲ့ အသင်းတစ်သင်းပါပဲ။ ဒါပေမဲ့ အိုကေပါတယ်။ ယှဉ်ပြိုင်ကြရအောင်”ဟု ပြောကြားခဲ့သည်။
ဘာစီလိုနာအသင်းသည် ချန်ပီယံလိဂ်ပြိုင်ပွဲတွင် အုပ်စုတတိယနေရာသာ ရရှိသောကြောင့် ယူရိုပါလိဂ်ပြိုင်ပွဲသို့ ကူးပြောင်းယှဉ်ပြိုင်ရခြင်းဖြစ်ပြီး မန်ယူအသင်းကို ကျော်ဖြတ်နိုင်ပါက ရှုံးထွက်(၁၆)သင်းအဆင့်သို့ ရောက်ရှိမည်ဖြစ်သည်။
