ငွေကြေးမသမာမှုဖြင့် စစ်ဆေးခံနေရခြင်းနှင့်ပတ်သက်ပြီး နည်းပြ အယ်လီဂရီအပါအဝင် ကစားသမားများနှင့် ဝန်ထမ်းများကို တွေ့ဆုံကာ အသင်း၏အခြေအနေကို ဂျူဗင်တပ်စ်အသင်းဥက္ကဋ္ဌ အဂ္ဂါနယ်လီ ရှင်းလင်း

ဂျူဗင်တပ်စ်အသင်း၏ ဥက္ကဋ္ဌဖြစ်သူ အဂ္ဂါနယ်လီသည် အသင်းနည်းပြ အယ်လီဂရီအပါအဝင် အသင်းကစားသမားများနှင့် ဝန်ထမ်းများကို ဂျူဗင်တပ်စ်အသင်းအနေဖြင့် ငွေကြေးမသမာမှုဖြင့် စုံစမ်းစစ်ဆေးခံနေရခြင်းနှင့်ပတ်သက်ပြီး ခေါ်ယူတွေ့ဆုံကာ အသင်း၏အခြေအနေကို ရှင်းပြခဲ့ကြောင်း သိရသည်။ 

ဂျူဗင်တပ်စ်သည် ၂၀၁၉၊ ၂၀၂၀ နှင့် ၂၀၂၁ ခုနှစ်များတွင် ဘဏ္ဍာရေးရှင်းတမ်းကို လိမ်လည်ခဲ့သည်ဟုဆိုကာ တူရင်ပြည်သူ့ အစိုးရရှေ့နေများ၏ စုံစမ်းစစ်ဆေးခြင်းကို ခံနေရကြောင်း အီတလီမီဒီယာများက ဖော်ပြနေကြသည်။ ဂျူဗင်တပ်စ်အသင်းသည် ဘဏ်အကောင့်တုများ လုပ်ကာ ငွေကြေးမသမာမှုများပြုလုပ်မှုဖြင့် စုံစမ်းစစ်ဆေးခံနေရခြင်းဖြစ်ပြီး တူရင်အစိုးရရှေ့နေများသည် ဂျူဗင်တပ်စ်ဥက္ကဋ္ဌ အဂ္ဂါနယ်လီ၊ ဒုဥက္ကဋ္ဌ နက်ဗက်အပါအဝင် အသင်းတာဝန်ရှိသူ ၁၆ ဦးကို စစ်ဆေးနေကြောင်း သိရှိရသည်။

ဂျူဗင်တပ်စ်အနေဖြင့် ယင်းကဲ့သို့ ငွေကြေးမသမာမှုဖြင့် စစ်ဆေးခံနေရချိန်တွင် အသင်းဥက္ကဋ္ဌ အဂ္ဂါနယ်လီသည် အသင်းနှင့်ပတ်သက်သူများကို အစည်းအဝေးခေါ်ခဲ့ခြင်း ဖြစ်ကြောင်း Sky Sports Italia က ဖော်ပြခဲ့သည်။ Sky Sports Italia ၏ ဖော်ပြချက်အရ အဂ္ဂါနယ်လီသည် ဂျူဗင်တပ်စ်အသင်းနည်းပြ အယ်လီဂရီအပါအဝင် ကစားသမားများ အားလုံးနှင့် အသင်းဝန်ထမ်းများကိုပါ အသင်း၏လေ့ကျင့်ရေးကွင်းတွင် အစည်းအဝေးခေါ်ယူကာ လက်ရှိအခြေအနေကို ရှင်းပြခဲ့ကြောင်း သိရသည်။ 

အဂ္ဂါနယ်လီက ဂျူဗင်တပ်စ်အသင်းအနေဖြင့် ယခုကဲ့သို့ ခက်ခဲကျပ်တည်းသည့်အခြေအနေနှင့် ကြုံတွေ့နေရချိန်တွင် အသင်းနှင့်ပတ်သက်သူများအနေဖြင့် စည်းလုံးကြရန်၊ လက်ရှိ ရင်ဆိုင်နေရသည့် ပြဿနာနှင့်ပတ်သက်ပြီး အကြောက်မလွန်ရန်၊ မိမိတို့အသင်းအနေဖြင့် အမြဲတမ်းမှန်ကန်သည့်လုပ်ရပ်များကိုသာ လုပ်ခဲ့သည်ဟု ပြောကြားခဲ့ကြောင်း Sky Sports Italia က ဖော်ပြခဲ့သည်။ 

တူရင်အစိုးရရှေ့နေများသည် ဂျူဗင်တပ်စ်အသင်း၏ ငွေကြေးမသမာမှုကို စစ်ဆေးရာတွင် အသင်းနှင့် ကစားသမားများအကြား လျှို့ဝှက်သဘောတူစာချုပ်များ ချုပ်ဆိုထားခြင်းကို တွေ့ရှိခဲ့ကြောင်း သိရသည်။ ဂျူဗင်တပ်စ်အသင်းသည် ကိုဗစ်ကာလ၌ အသင်း တိုက်စစ်မှူးဟောင်း စီရော်နယ်လ်ဒိုကို တရားဝင်မှတ်တမ်းတင်ထားခြင်းမရှိဘဲ ယူရိုသန်း ၂၀ နီးပါး ပေးချေခဲ့ကြောင်းလည်း သိရသည်။ 

ဂျူဗင်တပ်စ်အသင်းသည် ၂၀၂၀ မတ်လတွင် ကိုဗစ်ကပ်ဘေးကြောင့် အသင်း၏လစာကို ထက်ဝက်လျှော့ချခဲ့ကြောင်း ထုတ်ပြန်ကြေညာခဲ့သော်လည်း ကစားသမားများကို တရားမဝင်လစာပေးချေမှုများ ရှိခဲ့သည်ဟု အစိုးရရှေ့နေများက ယုံကြည်နေကြပြီး ယင်းအချက်များကို သက်သေပြရန် စုံစမ်းစစ်ဆေးမှုများ ပြုလုပ်နေခြင်းဖြစ်ကြောင်း အီတလီမီဒီယာများက ဖော်ပြခဲ့ကြသည်။