မန်ယူနှင့် စပါးအသင်းတိုက်စစ် မှူးဟောင်း ရှရင်ဂမ်က မန်ယူအသင်းအား စပါးတိုက်စစ်မှူး ဟာရီကိန်းနှင့် ဝက်စ်ဟမ်းကွင်းလယ်လူ ဒက်ကလန် ရိုက်တို့ကို ခေါ်ယူရန် တိုက်တွန်းပြော ကြားခဲ့သည်။
မန်ယူအသင်းသည် ပြီးခဲ့သည့် နွေရာသီတွင် ကက်စီမီရို၊ လီဆန်ဒရိုမာတီနက်ဇ်၊ မာလာစီယာ၊ အန်တိုနီ၊ အဲရစ်ဆင်နှင့် ဒူဘရေကာတို့ (၆)ဦးကို ပေါင် (၂၂၅) သန်း အသုံးပြုကာ ခေါ်ယူခဲ့သည်။ ထို့ကြောင့် မန်ယူအသင်းအနေဖြင့် လာမည့်ဇန်နဝါရီတွင် ငွေကြေးအသုံးပြုဖွယ်မရှိဟု ပြောဆိုနေကြသော်လည်း ရှရင်ဂမ်က တန်ဟက်ဂ်လက်ထက်တွင် ပြန်လည်တည်ဆောက်နေသည့် မန်ယူအသင်းအနေဖြင့် ငွေကြေးအမြောက်အများ အသုံးပြုကာ ထိပ်တန်းကစားသမားများခေါ်ယူသင့်ကြောင်း တိုက်တွန်းခဲ့ခြင်းဖြစ်သည်။
“မန်ယူက အကောင်းဆုံးတွေကို အမြဲခေါ်လေ့ရှိပါတယ်။ မန်ယူအသင်းဟာ ရွိုင်ကင်း၊ ဖာဒီနန်၊ ရွန်နီတို့လို အကောင်းဆုံးတွေကို ခေါ်ယူခဲ့ဖူးပါတယ်။ မန်ယူအနေနဲ့ ပရော်ဖက်ရှင်နယ်ပီသပြီး အသင်းအတွက် အာရုံစိုက်ထားတဲ့ ဟာရီကိန်းလို ကစားသမားကို ခေါ်ယူဖို့ လိုပါတယ်။ မန်ယူက ဂိုးသွင်းသေချာတဲ့တိုက်စစ်မှူး လိုနေတာဖြစ်ပြီး ဟာရီကိန်းက ကွက်တိပါပဲ။ ပြီးတော့ ပွဲရဲ့ Tempo ကို လိုသလို ထိန်းနိုင်တဲ့ ဒက်ကလန်ရိုက်ကို ခေါ်ယူနိုင်မယ်ဆိုရင် မန်ယူအတွက် အရမ်းကောင်းသွားမှာပါ။ မန်ယူ လိုအပ်နေတာ သူတို့လိုကစားသမားတွေဖြစ်ပြီး တီလေမန်းစ်ဆိုရင်လည်း မဆိုးပါဘူး”ဟု ၎င်းက ပြောကြားခဲ့သည်။
