အင်္ဂလိပ်ကလပ်အသင်းများစွာကို ကိုင်တွယ်ခဲ့သည့် ဝါရင့်နည်းပြဟောင်း နေးလ်ဝါနော့ခ်က အင်္ဂလန်တိုက်စစ်မှူး ဟာရီကိန်းအနေဖြင့် စပါးအသင်းတွင် ဆက်ကစားခြင်းထက် နယူးကာဆယ်အသင်းသို့ ပြောင်းရွှေ့ကစားခြင်းက ဆုဖလားများရရှိရန် ပိုမိုအခွင့်အလမ်းများမည်ဟု သုံးသပ်ပြောကြားခဲ့သည်။
အသက် (၂၉)နှစ်အရွယ် ဟာရီကိန်းသည် စပါးအကယ်ဒမီထွက်ဖြစ်ပြီး ပရော်ဖက်ရှင်နယ်ကစားသမားဘ၀ အစပိုင်းတွင် အသင်းငယ်များသို့ အငှားသွားရောက်ကစားခဲ့သည်မှအပ လက်ရှိအချိန်ထိ စပါးတစ်သင်း တည်း၌ ကစားနေသူဖြစ်သည်။
ဟာရီကိန်းသည် ပရီးမီးယားလိဂ်ရွှေဖိနပ်ဆုကို (၃)ကြိမ်အထိ ရယူထားသလို၊ (၂၆၅)ဂိုးသွင်းယူထားပြီး သမိုင်းတွင် ဂိုးသွင်းအများဆုံးဖြစ်သည့် ဂျင်မီဂရိဗ်၏ (၂၆၆ ဂိုး)စံချိန်ကို လိုက်မီရန် (၁)ဂိုးသာ လိုတော့သည်။ သို့သော် ဟာရီကိန်းအနေဖြင့် ကစားသမားဘဝတွင် မည်သည့်ဆုဖလားမျှ မရဖူးသေးပေ။
ထို့ကြောင့် နေးလ်ဝါနော့ခ်က “ပြီးခဲ့တဲ့နွေတုန်းက ဟာရီကိန်းအနေနဲ့ မန်စီးတီးကိုရောက်မယ်လို့ ထင်ခဲ့တာပါ။ ဒါပေမဲ့ အခု မန်စီးတီးက မယုံနိုင်လောက်အောင်ကောင်းတဲ့ ဟော်လန်းကို ပိုင်ဆိုင်ထားပါပြီ။ အခု နယူးကာဆယ်က တော်တော်လေးကောင်းပြီး အနာဂတ်မှာ ဆုဖလားတွေ မျှော်လင့်နိုင်ပါလိမ့်မယ်။ ဟာရီကိန်းအနေနဲ့သာ နယူးကာဆယ်သွားမယ်ဆိုရင် အရမ်းကောင်းမှာပါ။ ဒါပေမဲ့ စပါးအသင်းက ဟာရီကိန်းအတွက် ပေါင်သန်း (၂၅၀)လောက် တောင်းမယ်လို့ ထင်ပါတယ်” ဟု ပြောကြားခဲ့သည်။
