စပါးအသင်းနှင့် စာချုပ်သစ်ချုပ်ဆိုနိုင်ခဲ့သည့် ဝမ်းသာကြောင်း ဆွန်ဟောင်မင် ပြောကြား

စပါးတိုက်စစ်ကစားသမား ဆွန်ဟောင်မင်က အသင်းနှင့် စာချုပ်သစ်ချုပ်ဆိုနိုင်ခဲ့သည့်အတွက် ဝမ်းသာကြောင်း ပြောကြားခဲ့သည်။

စပါးအသင်းသည် အသက် (၂၉)နှစ်အရွယ်ရှိ တောင်ကိုရီးယားတိုက်စစ်ကစားသမား ဆွန်ဟောင်မင်ကို ၂၀၂၅ ခုနှစ်အထိ သက်တမ်းရှိ စာချုပ်သစ်တစ်ရပ် ချုပ်ဆိုနိုင်ခဲ့ကြောင်း ဇူလိုင်လ (၂၃)ရက်တွင် အတည်ပြုကြေညာခဲ့သည်။

စပါးအသင်းတွင် အသင်း၏အဓိကတိုက်စစ်မှူး ဟာရီကိန်း၏ အပြောင်းအရွှေ့သတင်းများမှာ လှုပ်ခတ်နေချိန်တွင် အဓိက ကစားသမားဖြစ်သူ ဆွန်ဟောင်မင်ကို စာချုပ်သစ်ချုပ်ဆိုခဲ့ခြင်းဖြစ်သည်။

ဆွန်ဟောင်မင်က စပါးအသင်းနှင့် စာချုပ်သစ်ချုပ်ဆိုရန် ဆုံးဖြတ်ခဲ့ခြင်းမှာ မိမိအတွက် လွယ်ကူကြောင်း ပြောကြားခဲ့သည်။

“စပါးအသင်းက ကျွန်တော့်အတွက် အိမ်လိုပါပဲ။ အထူးသဖြင့် ပရိသတ်တွေ၊ အသင်းဖော်တွေနဲ့ ဝန်ထမ်းတွေက ကျွန်တော့်အတွက် မိသားစုလိုပါပဲ။ ဒါကြောင့် စပါးအသင်းနဲ့ စာချုပ်သစ်ချုပ်ဆိုဖို့ ဆုံးဖြတ်ရတာ ကျွန်တော် လွယ်ကူပါတယ်။ စပါးအသင်းမှာ ဆက်ရှိနေမှာဖြစ်လို့ ကျွန်တော် အရမ်းပျော်ပါတယ်။ ပရိသတ်တွေကို ပြန်တွေ့ခွင့်ရတော့မှာဖြစ်လို့လည်း ကျွန်တော် ဝမ်းသာပါတယ်”ဟု ဆွန်ဟောင်မင်က ပြောကြားခဲ့သည်။

ဆွန်ဟောင်မင်သည် ၂၀၁၅ နွေရာသီအပြောင်းအရွှေ့ကာလတွင် လေဗာကူဆင်အသင်းမှ စပါးအသင်းသို့ ပေါင်(၂၂)သန်းဖြင့် ပြောင်းရွှေ့လာခဲ့သူ ဖြစ်သည်။