ဘိုင်ယန်မြူးနစ်အသင်းသည် စပါးအသင်းမှ အင်္ဂလန်လက်ရွေးစင်တိုက်စစ်မှူး ဟာရီကိန်းအား ခေါ်ယူနိုင်ရန်အတွက် ကလပ်စံချိန်တင်ပြောင်းရွှေ့ကြေး ပေါင် ၈၅ သန်းအထိ အသုံးပြုသွားရန် အသင့်ရှိနေကြောင်း သိရသည်။
ဘိုင်ယန်အသင်း၏ကလပ်အမှုဆောင်များဖြစ်သည့် ယန်းခရစ္စတီယန်ဒရီးဆန်နှင့် မာကိုနက်ပယ်သည် လန်ဒန်မြို့သို့ရောက်ရှိ ခဲ့ပြီး စပါးအသင်းဥက္ကဋ္ဌဖြစ်သူ ဒန်နီယဲလ်လီဗီနှင့် ဇူလိုင်လ ၃၁ ရက်က ဆွေးနွေးခဲ့ကြောင်း သတင်းများက ဖော်ပြခဲ့သည်။ ဗြိ တိန်သတင်းစာ Daily Mail က ဖော်ပြမှုတွင် ယင်းဆွေးနွေးမှု၌ ဟာရီကိန်း၏အပြောင်းအရွှေ့အတွက် သဘောတူညီမှု မရရှိခဲ့သဖြင့် ဘိုင်ယန်အသင်းက ကြေးတိုးမြှင့်ကမ်းလှမ်းရန် ပြင်ဆင်နေပြီဟု ရေးသားခဲ့သည်။
ဘိုင်ယန်အသင်းသည် အက်သလက်တီကို အသင်းမှ ပြင်သစ်နောက်ခံလူ လူးကပ်စ်ဟာနန်ဒက်ဇ်အား ၂၀၁၉ ခုနှစ်က ပေါင် ၆၈ သန်းဖြင့် ခေါ်ယူခဲ့မှုမှာ လက်ရှိအချိန်အထိ ကလပ်စံချိန်တင်ပြောင်းရွှေ့ကြေးအဖြစ် မှတ်တမ်းဝင်လျက်ရှိသည်။ ဟာရီကိန်းသည် ဂျာမန်ထိပ်သီးကလပ် ဘိုင်ယန်အသင်းထံ ပြောင်းရွှေ့ရန် ဆန္ဒပြင်းပြနေပြီး စပါးဥက္ကဋ္ဌ လီဗီကမူ အသင်း၏အဓိကတိုက်စစ်မှူးကို အနည်းဆုံး ပြောင်းရွှေ့ကြေး ပေါင် သန်း ၁၀၀ ရရှိမှ လက်လွှတ်ရန် ဆန္ဒရှိနေသည်။
ဘိုင်ယန်အသင်းအနေဖြင့် ဟာရီကိန်းအား အပြီးသတ် ခေါ်ယူနိုင်ရန်အတွက် ပြောင်းရွှေ့ကြေး ပေါင် သန်း ၉၀ ဝန်းကျင်ဖြင့် ကမ်းလှမ်းဖွယ်ရှိနေသည်ဟုလည်း သတင်းများက ရေးသားလျက်ရှိသည်။ သတင်းအချို့တွင် ဖော်ပြချက်အရ ဘိုင်ယန်အသင်းသည် ဟာရီကိန်းနှင့် ပုဂ္ဂိုလ်ရေးသဘောတူညီမှုပင် ရရှိထားပြီး လေးနှစ်စာချုပ် ချုပ်ဆိုမည်ဖြစ်ကြောင်း သိရသည်။
ဒရီးဆန်နှင့် နက်ပယ်တို့ဦးဆောင်သော ဘိုင်ယန်အသင်းကိုယ်စားလှယ်အဖွဲ့သည် ဥက္ကဋ္ဌ လီဗီနှင့် ဆွေးနွေးပြီးနောက် ယင်းနေ့မှာပင် မြူးနစ်သို့ ပြန်သွားခဲ့ပြီး ဆွေးနွေးမှု၌ သဘောတူညီမှု မရရှိသော်လည်း အပေါင်းလက္ခဏာဆောင်ခဲ့ကြောင်း သိရသည်။ စပါးအသင်းသည် ဟာရီကိန်း အသင်းမှထွက်ခွာခဲ့လျှင် ပြန်လည်အစားထိုးမှုများ ပြုလုပ်သွားရန်လည်း ပြင်ဆင်ထားလျက်ရှိသည်။
ဘိုင်ယန်လူငယ်တိုက်စစ်မှူး မာသီတဲလ်မှာလည်း စပါးအသင်းပစ်မှတ်ထဲတွင် ပါဝင်လျက်ရှိနေပြီး KRC ဂျန့်အသင်းမှ အော်ဘန်၊ နော်တင်ဟမ်အသင်းမှ ဘရန်နန်ဂျွန်ဆင်တို့ုနှင့် ပြန်လည်အစားထိုးရန် စီစဉ်ထားကြောင်း သိရသည်။
