မန်စီးတီးအသင်း၏နည်းပြ ဂွါဒီယိုလာသည် လက်ရှိစာချုပ်သက်တမ်းကုန်ဆုံးမည့် ၂၀၂၅ ခုနှစ်တွင် မန်စီးတီးအသင်းနှင့် လမ်းခွဲဖွယ်ရှိကြောင်း The Guardian သတင်းစာက သုံးသပ်ဖော်ပြခဲ့သည်။
ဂွါဒီယိုလာ(၅၂ နှစ်)သည် မန်စီးတီးအသင်းကို ၂၀၁၆ ခုနှစ်တွင် စတင်ကိုင်တွယ်ခဲ့ပြီး (၇)နှစ်ပြည့်တော့မည်ဖြစ်သည့်အတွက် ၎င်း၏ နည်းပြသက်တမ်းတွင် အရှည်ကြာဆုံးလက်တွဲမှုဖြစ်နေသည်။
ဂွါဒီယိုလာသည် ပြီးခဲ့သည့် နိုဝင်ဘာလအတွင်းက ၂၀၂၅ ခုနှစ်အထိ သက်တမ်းရှိမည့်စာချုပ်သစ် ချုပ်ဆိုခဲ့ပြီး ယင်းကဲ့သို့ သက်တမ်းတိုးခဲ့ခြင်းမှာ ချန်ပီယံလိဂ်ဖလား ရယူနိုင်ခြင်းမရှိသေးသောကြောင့်ဖြစ်ကြောင်း သုံးသပ်မှုများလည်း ရှိခဲ့သည်။
ယခုအခါ ဂွါဒီယို လာသည် မန်စီးတီးအသင်းအတွက် ချန်ပီယံလိဂ်ဖလားသာမက တစ်ရာသီအတွင်း ဖလား (၃)လုံးအောင်ပွဲပါ ရယူပေးနိုင်ခဲ့ပြီဖြစ်သောကြောင့် သက်တမ်းထပ်တိုးဖွယ်မရှိတော့ကြောင်း The Guardian က သုံးသပ်ခဲ့ခြင်းဖြစ်သည်။
ဂွါဒီယိုလာသည် ဘာစီလိုနာအသင်းကို (၄)နှစ်သာ ကိုင်တွယ်ခဲ့သလို၊ ဘိုင်ယန်မြူးနစ်အသင်းကိုလည်း (၃)နှစ်သာ ကိုင်တွယ်ခဲ့ပြီး ယခုစာချုပ်သက်တမ်းအတိုင်းဆိုပါက မန်စီးတီးအသင်းနှင့် (၉)နှစ်ကြာလက်တွဲမှု ဖြစ်လာမည်ဖြစ်သည်။
ထို့ကြောင့် ၂၀၂၅ ခုနှစ်တွင် မန်စီးတီးအသင်းမှ ထွက်ခွာ၍ စိန်ခေါ်မှုအသစ် ရှာဖွေဖွယ်ရှိ ကြောင်း သုံးသပ်ခြင်းဖြစ်ပြီး ၎င်းအနေဖြင့် လက်ရွေးစင်အသင်းတစ်သင်းကို ပြောင်းလဲကိုင်တွယ်ဖွယ်ရှိသည်ဟု ထင်ကြေးပေးခံထားရသည်။
