စပါးအသင်းပိုင်ရှင်ဖြစ်သူ ဗြိတိန်စီးပွားရေးသမား ဂျိုးလူးဝစ်က တိုက်စစ်မှူး ဟာရီကိန်းအနေဖြင့် စာချုပ်သစ်မချုပ်လျှင် ယခုနွေရာသီတွင် ရောင်းချရန် ဥက္ကဋ္ဌ ဒန်နီယဲလ်လီဗီကို ပြောကြားခဲ့သောကြောင့် အပြောင်းအရွှေ့သတင်းများ ပိုမိုလှုပ်ခတ်လာကြောင်း သိရသည်။
ယခုရက်သတ္တပတ်အတွင်း အသက် (၃၀) ပြည့်တော့မည့် ဟာရီကိန်းနှင့် စပါးအသင်း၏ စာချုပ်သက်တမ်းမှာ နောက်ဆုံးနှစ်သို့ ရောက်ရှိနေပြီဖြစ်ပြီး ၂၀၂၄ ခုနှစ် နွေရာသီတွင် ကုန်ဆုံးမည်ဖြစ်သည်။
စပါးအသင်းက ၎င်းအား မြင့်မားသည့်လစာ (တစ်ပတ်လစာ ပေါင်လေးသိန်းဟု ဖော်ပြနေ) ဖြင့် စာချုပ်သစ်ချုပ်ဆိုရန် ကမ်းလှမ်းထားသော်လည်း ကစားသမားကိုယ်တိုင်က စာချုပ်သစ် မချုပ်ဘဲ အသင်းပြောင်းရွှေ့ရန် ဆန္ဒရှိနေကြောင်း သိရသည်။
သို့ဖြစ်ရာ စာချုပ်သစ်မချုပ်လျှင် ပြောင်းရွှေ့ကြေးအလွတ်ဖြင့် ထွက်ခွာခွင့်ပြုရမည်ဖြစ်သောကြောင့် စပါးအသင်း၏ရှယ်ယာ (၈၅.၅၅) ရာခိုင်နှုန်း ပိုင်ဆိုင်ထားသူ အသင်းပိုင်ရှင် ဂျိုးလူးဝစ်က ဟာရီကိန်းအား ယခုနွေရာသီတွင် ရောင်းချရန် ဥက္ကဋ္ဌ ဒန်နီယဲလ်လီဗီကို ပြောကြားခဲ့ကြောင်း The Telegraph သတင်းဌာနက ဖော်ပြခဲ့ပြီးနောက် အဆိုပါသတင်းကိုကိုးကား၍ ဗြိတိန်သတင်းဌာနများစွာက ပြန်လည်ဖော်ပြခဲ့ကြသည်။
ထို့ကြောင့် ဟာရီကိန်း၏ အပြောင်းအရွှေ့သတင်းများမှာ ပိုမိုလှုပ်ခတ်လာပြီး ဘိုင်ယန်မြူးနစ်အသင်းအပြင် PSG အသင်း နှင့် ယခင်ကြိုးပမ်းခဲ့ဖူးသည့် မန်ယူအသင်းကလည်း တစ်ကျော့ပြန် ကြိုးပမ်းဖွယ်ရှိနေသည်။
ဘိုင်ယန်မြူးနစ်အသင်းက ဟာရီကိန်းအတွက် ပေါင်သန်း ၆၀၊ ပေါင်သန်း ၇၀+Add-ons ကြေးများဖြင့် နှစ်ကြိမ်ကမ်းလှမ်းခဲ့သော်လည်း စပါးအသင်းက လက်မခံဘဲ ပယ်ချထားသည်။
ထို့ကြောင့် စပါးအသင်း အာရှခြေစမ်းခရီးစဉ်မှ ပြန်လည်ရောက်ရှိပါက တတိယအကြိမ် ထပ်မံကမ်းလှမ်းရန် စီစဉ်လျက်ရှိကြောင်း သိရသည်။
မန်ယူအသင်းမှာလည်း ယခုနွေရာသီတွင် ဟာရီကိန်းကိုခေါ်ယူရန် နံပါတ် (၁) ဦးစားပေးအဖြစ် သတ်မှတ်ထားပြီး မေးမြန်းမှုများ လုပ်ခဲ့သော်လည်း စပါးအသင်းအလိုရှိနေသည့် ပေါင်သန်း (၁၀၀) ကျော်အထိ ပေးချေနိုင်ခြင်းမရှိသဖြင့် လက်လျှော့ခဲ့ရခြင်းဖြစ်သည်။
ထို့ပြင် PSG အသင်းမှာလည်း ပြင်သစ်ကြယ်ပွင့်တိုက်စစ်မှူး ဘာပေကို လက်လွှတ်ရဖွယ်ရှိနေသောကြောင့် ၎င်းနေရာတွင် ဟာရီကိန်းကို အစားထိုးရန် စိတ်ဝင်စားနေကြောင်း သိရသည်။
ဟာရီကိန်း၏ ဇနီးဖြစ်သူကမူ ဂျာမနီနိုင်ငံ၊ မြူးနစ်မြို့၌ နေအိမ်နှင့် ကလေးများအတွက် ကျောင်းများ စုံစမ်းနေပြီဖြစ်ကြောင်း ဗြိတိန်သတင်းဌာနများက ဖော်ပြလျက်ရှိသည်။
ဟာရီကိန်းသည် စပါးအသင်း၏အကယ်ဒမီထွက် ကစားသမားဖြစ်ပြီး စီနီယာအသင်းအတွက် ပြိုင်ပွဲစုံ (၄၃၅) ပွဲကစား၊ ဂိုး (၂၈၀) သွင်းယူကာ အသင်းသမိုင်း တစ်လျှောက် ဂိုးအများဆုံးစံချိန် တင်ထားသူဖြစ်သည်။
