မန်ယူကစားသမားဟောင်း ဂယ်ရီနဗီးလ်က အသင်းအနေဖြင့် စီရော်နယ်လ်ကို စာချုပ်ဖျက်သိမ်းသင့်သည်ဟု ပြောကြားခဲ့သည်။
စီရော်နယ်လ်ဒိုသည် နာမည်ကျော် အင်တာဗျူးသမားတစ်ဦးဖြစ်သူ ပီယာ့စ်မော်ဂန်နှင့် တွေ့ဆုံရာတွင် ကလပ်အသင်းက သူ့ကို သစ္စာဖောက်ခဲ့သည်ဟု စွပ်စွဲခဲ့ပြီးနောက် ကမ္ဘာ့သတင်းမီဒီယာများထက်တွင် မန်ချက်စတာယူနိုက်တက်နှင့် ၎င်းတို့အကြား အကွဲအပြဲသတင်းများလည်း ပျံ့နှံ့ထွက်ပေါ်လာခဲ့သည်။
စီရော်နယ်လ်ဒိုသည် အဆိုပါအင်တာဗျူးတွင် မန်ယူအသင်းဖော်ဟောင်းများဖြစ်သည့် ၀ိန်းရွန်နီနှင့် ဂယ်ရီနဗီးလ်တို့ကို ဝေဖန်ခဲ့ပြီး ဂယ်ရီနဗီးလ်သည် နာမည်ကျော်ကြားမှုအတွက် မိမိကို အသုံးချနေသည်ဟု စွပ်စွဲပြောကြားခဲ့သည်။
ယခုအခါ ဂယ်ရီနဗီးလ်က အသင်းကို လူသိရှင်ကြားဝေဖန်ခဲ့သူ စီရော်နယ်လ်ဒိုအား ဆက်မထားသင့်တော့ဘဲ စာချုပ်ဖျက်သိမ်းသင့်သည်ဟု ဆိုခဲ့ခြင်းဖြစ်သည်။
ဂယ်ရီနဗီးလ်က “စီရော်နယ်လ်ဒို ပြောခဲ့တာတွေထဲက တချို့ကို ကျွန်တော် သဘောတူသလို၊ မန်ယူပရိသတ်များစွာကလည်း သဘောတူမှာပါ။ ဒါပေမဲ့ ဒီစီးပွားရေးရဲ့ အလုပ်သမားတစ်ယောက် ဖြစ်နေမယ်ဆိုရင်တော့ ဝေဖန်ပြစ်တင်မှုတွေကို ရင်ဆိုင်တာ ဒါမှမဟုတ် စာချုပ်ဖျက်သိမ်းတာမျိုး လုပ်သင့်ပါတယ်”ဟု ပြောကြားခဲ့သည်။
