TalkSPORT ရဲ့ Pundit တစ်ဦး ဖြစ်သူ အဲလက်စ်ခရွတ်က မန်ချက်စတာယူနိုက်တက် မန်နေဂျာ အိုလီဂန်နာဆိုးရှားကို ဘယ်ပရီးမီးယားလိဂ် ကလပ်ကမှ ခေါ်ယူမှာ မဟုတ်ဘူးလို့ ဆိုလိုက်ပြီး နော်ဝေးနည်းပြဟာ သရဲနီ တို့ကို ကိုင်တွယ်ရန် လုံလောက်တဲ့ အရည်အသွေး မရှိဘူးလို့ ပြောလိုက်ပါတယ်။
ဆိုးရှားဟာ ပြီးခဲ့တဲ့ စနေနေ့က မန်ချက်စတာယူနိုက်တက်နဲ့ ၃ နှစ် စာချုပ်သစ် ချုပ်ဆိုခဲ့ပြီး အဲဒီနေ့မှာပဲ QPR နဲ့ ကစားခဲ့တဲ့ ခြေစမ်းပွဲမှာ ၎င်းရဲ့ အသင်းဟာ ၄-၂ နဲ့ ရှုံးနိမ့်ခဲ့ပါတယ်။ လွန်ခဲ့တဲ့ ၂၀၁၈ ဒီဇင်ဘာလက မော်ရင်ညိုရဲ့ နေရာမှာ အစားဝင်လာခဲ့ပြီးနောက် ဆိုးရှားဟာ ယူနိုက်တက်ကို ဆီမီးဖိုင်နယ် ၄ ကြိမ် ၊ ဖိုင်နယ် ၁ ကြိမ် ပို့ဆောင်ပေးခဲ့ပေမယ့်လည်း အိုးထရပ်ဖို့ဒ်မှာ ၎င်းရဲ့ ပထမဦးဆုံး ဆုဖလားကိုတော့ မရသေးပါဘူး။
ခရွတ်က အကယ်၍ ဆိုးရှားသာ Available ဖြစ်နေခဲ့မယ် ဆိုရင် အခြား ပရီးမီးယားလိဂ် ၁၉ သင်းဟာ ၎င်းကို နည်းပြအဖြစ် ခန့်အပ်ဖို့ အတွက် စဉ်းစားသွားမှာ မဟုတ်ဘူးလို့ ဆိုလိုက်ပါတယ်။
၎င်းက “အကယ်၍ အိုလီဂန်နာဆိုးရှားသာ Available ဖြစ်နေခဲ့မယ် ဆိုရင် သူ့ကို မန်နေဂျာသစ် အဖြစ် ခန့်အပ်ဖို့ အတွက် ပစ်မှတ်ထားမယ့် ပရီးမီးယားလိဂ် ကလပ် ဘယ်လောက်များများ ရှိနိုင်မလဲ? ကျွန်တော် ကတော့ ဘယ်အသင်းမှ သူ့ကို ကလပ်ရဲ့ မန်နေဂျာသစ် အဖြစ် ခန့်အပ်ဖို့ အတွက် စဉ်းစားလိမ့်မယ်လို့ မထင်မိပါဘူး။” လို့ ဆိုလိုက်ပါတယ်။
ခရွတ်က ဆိုးရှားရဲ့ နည်းဗျူဟာ အရည်အသွေးကို တကယ့် အရေးကြီးတဲ့ အချိန်တွေမှာ တွေ့မြင်နိုင်တယ်လို့ ပြောခဲ့ပါတယ်။
ခရွတ်က “သူဟာ ကစားသမားတွေနဲ့ ဆက်ဆံရေး အဆင်ပြေတယ်လို့ သိရပါတယ်။ ဒါပေမယ့် winning mentality မရှိဘဲ သူ့ရဲ့ ကစားသမား ဘဝကလို အောင်မြင်မှုမျိုး မရနိုင်ပါဘူး။ သူ့ရဲ့ ဆက်ဆံရေး ကောင်းမှုက ပြသနာလို့ ကျွန်တော် မထင်ပါဘူး။ နည်းစနစ်ပိုင်းဆိုင်ရာမှာ သူဟာ အားနည်းချက် ရှိပါတယ်။ ဒါကို ပြီးခဲ့တဲ့ ယူရိုပါလိဂ် ဖိုင်နယ်မှာ တွေ့မြင်နိုင်ပါတယ်။ ပြီးခဲ့တဲ့ ရာသီတွေက ဆီမီးဖိုင်နယ် အဆင့်တွေမှာလည်း ဒါကို မြင်တွေ့ခဲ့ရမှာပါ။
သူဟာ လက်စတာနဲ့ အက်ဖ်အေဖလား ဆီမီးဖိုင်နယ်မှာ အသင်း ရွေးချယ်မှု လုံးဝကို မှားယွင်းခဲ့ပြီး နောက်ဆုံးမှာတော့ ပြိုင်ပွဲကနေ ထွက်ခွာခဲ့ ရပါတယ်။ ယူနိုက်တက်တို့ ဆုဖလား ရဖို့ နီးစပ်တဲ့ အနေအထားကို ရောက်လာတဲ့ အချိန်တိုင်း အိုလီဂန်နာဆိုးရှားဟာ အမှားအယွင်းတွေ လုပ်လေ့ ရှိပါတယ်။ သူဟာ ကစားသမားတွေ အပေါ် ကိုင်တွယ်မှု ညင်သာနေလို့ မဟုတ်ပါဘူး။ အမှန်တကယ်က သူဟာ ထိပ်တန်း မန်နေဂျာ တစ်ဦးရဲ့ အရည်အသွေးမျိုး ရှိမနေလို့ ဖြစ်ပါတယ်။” လို့ ပြောလိုက်ပါတယ်။
