ဝက်စ်ဟမ်းအသင်းသည် ဆောက်သမ်တန်အသင်းမှ အင်္ဂလန်ကွင်းလယ်ကစားသမား ဝက်ပရောက်စ်အား ပေါင် ၂၅ သန်းဖြင့် ခေါ်ယူရန် စီစဉ်နေကြောင်း သိရှိရသည်။
ဝက်စ်ဟမ်းအသင်းသည် အသင်းကွင်းလယ် ကစားသမား ဒက်ကလန်ရိုက်စ်အား အာဆင်နယ်အသင်းထံ Add-ons ကြေးအပါအဝင် ပေါင် ၁၀၅ သန်းဖြင့် ရောင်းချပြီးနောက် အသင်း၏ ကွင်းလယ်ပိုင်းကို ပြန်လည်အင်အားဖြည့်တင်းရန် စီစဉ်လျက်ရှိသည်။
ဝက်ပရောက်စ် (၂၄ နှစ်)သည် ဆောက်သမ်တန်နှင့် ၂၀၂၆ ခုနှစ် အထိ စာချုပ်သက်တမ်းရှိနေသော်လည်း ပြီးခဲ့သည့်ရာသီက ပရီးမီးယားလိဂ်မှ တန်းဆင်းခဲ့ရသဖြင့် ယခုနွေတွင် အသင်းပြောင်းရွှေ့ရန် ဆန္ဒရှိနေကြောင်း သိရှိရသည်။
ဝက်စ်ဟမ်းအသင်းသည် ဝက်ပရောက်စ်အား ခေါ်ယူရန် ဆွေးနွေးမှုများပြုလုပ်နေပြီး ပေါင် ၂၅ သန်းဖြင့် ကမ်းလှမ်းရန်အသင့်ရှိနေကြောင်း Daily Mail က ဖော်ပြခဲ့သည်။
သို့သော် ဆောက်သမ်တန်အသင်းကမူ ၎င်းတို့၏ ကွင်းလယ်ကစားသမား ဝက်ပရောက်စ်အတွက် ပေါင်သန်း ၄၀ အထိ အလိုရှိနေကြောင်း သိရှိရသည်။
