ဆော်ဒီကနေ ကြီးမားတဲ့ အပြောင်းအရွှေ့ကမ်းလှမ်းမှုတွေ ရထားတဲ့ ချဲလ်ဆီးနဲ့ ဝုလ်ဗ် အပေါ် စုံစမ်းစစ်ဆေးပေးဖို့ ယူအီးအက်ဖ်အေထံ ပြိုင်ဖက် ဥရောပကလပ်များက တောင်းဆို

လတ်တလောမှာ ဆော်ဒီ ပရိုလိဂ် ကလပ်တွေဟာ ပရီးမီးယားလိဂ်နဲ့ ဥရောပ တဝှမ်းမှ လူသိများတဲ့ နာမည်ကြီး စတား ကစားသမားတွေကို ခေါ်ယူဖို့ အလုံးအရင်းနဲ့ ကြိုးပမ်းနေပြီး ၊ ဒီအထဲမှာ ချဲလ်ဆီးနဲ့ ဝုလ်ဗ် ကစားသမားတွေဟာ ဆော်ဒီကလပ်တွေထံက စိတ်ဝင်စားမှုတွေ အကြီးအကျယ် ရထားပါတယ် ။

ဒီအပေါ် ပြိုင်ဖက် ဥရောပကလပ်တွေက မကျေမချမ်း ဖြစ်နေကြကြောင်း The Telegraph သတင်းဌာနက ဖော်ပြရေးသားထားပါတယ် ။ အမည်မဖော်လိုတဲ့ ထိပ်တန်း ကလပ် တသင်းဟာ ဆော်ဒီပရိုလိဂ်ကို ယူအီးအက်ဖ်အေ ဘဏ္ဍာရေး စည်းမျဉ်း အထူးလွတ်ငြိမ်းခွင့်ကဲ့သို့ အသုံးချနေကြကြောင်း စွပ်စွဲထားတယ်လို့ သိရပါတယ် ။

ဆော်ဒီလိဂ်ဟာ ဒီနှစ် နွေရာသီ ရီးရဲလ်မက်ဒရစ်ကနေ နာမည်ကြီး ပြင်သစ်ဝါရင့်တိုက်စစ်မှူး ကာရင် ဘန်ဇီမာကို ခေါ်ယူထားပြီး ဖြစ်သလို ၊ မကြာခင်မှာ ချဲလ်ဆီးကနေ ၄င်းနဲ့ တနိုင်ငံတည်းသား ဝါရင့် ကွင်းလယ်လူ အန်ဂိုလို ကန်တေကိုလည်း ၄နှစ် စာချုပ်နဲ့ ခေါ်ယူနိုင်တော့မှာ ဖြစ်ပါတယ် ။

အခုလို ဆော်ဒီ ကလပ်တွေ ပရီးမီးယားလိဂ်နဲ့ ဥရောပတဝှမ်းက စတားတွေကို ခေါ်ယူဖို့ လုပ်ဆောင်နေနိုင်ခြင်းဟာ ဆော်ဒီလိဂ်ကို ရေးဆွဲထားတဲ့ PIF အဖွဲ့အစည်းက လန်ဒန်အထိ ရောက်ရှိနေပြီး အပြောင်းအရွှေ့ ကိစ္စများကို ဒိုင်ခံ ဆောင်ရွက်နေခြင်းကြောင့် ဖြစ်ကြောင်း သိရပါတယ် ။

ချဲလ်ဆီးဟာ PIF ကြောင့် အကျိုးအမြတ် အရနိုင်ဆုံး အသင်း ဖြစ်လာဖွယ် ရှိပြီး ၊ ဒီစျေးကွက် အတွင်း ကစားသမား ၅ဦးကို ပေါင်သန်း ၁၀၀နဲ့ အထက် တန်ကြေး တရပ်နဲ့ ရောင်းချဖို့ ကမ်းလှမ်းထားတာ ဖြစ်ပါတယ် ။ ဒီအထဲမှာမှ ရိုမီလူ လူကာကူ တဦးတည်းသာ ဆော်ဒီသို့ ပြောင်းရွှေ့ဖို့ ငြင်းဆန်ထားတာ ဖြစ်ပါတယ် ။

အခြား ဝါရင့် ကစားသမား ၄ယောက် ဖြစ်တဲ့ အက်ဒွာ့ဒ် မန်ဒီ ၊ ကာလီဒူ ကူလီဘာလီ ၊ ဟာကင် ဇီယက်ခ်ျနဲ့ ပီယာအမ်းမရစ် အူဘားမီးယန်းတို့ဟာ ငွေရေးကြေးရေး အရရော ၊ အသက်အရွယ် အရပါ ဒီကမ်းလှမ်းမှုတွေက အရမ်း စိတ်လှုပ်ရှားဖို့ကောင်းသလို ၊ လိုက်ဖက်မှုလည်း ရှိနေပါတယ် ။

ဒီကစားသမားတွေသာ ရောင်းထုတ်နိုင်မယ်ဆိုရင် ချဲလ်ဆီး အတွက် လာမယ့်နှစ်မှာ စတင်မယ့် ပရီးမီးယားလိဂ် ဘဏ္ဍာရေး စည်းမျဉ်းနဲ့ အတော်အသင့် ကိုက်ညီသွားဖို့ ရှိပါတယ် ။ အခုလို ဆော်ဒီကလပ်တွေဆီ လစာများပြီး သုံးဖို့ အဆင်မပြေတော့တဲ့ ဝါရင့် ကစားသမားတွေကို ထုတ်ရောင်းတာက ဥရောပ ကလပ်တွေ အတွက် တကယ့် အိပ်မက်သဖွယ် ဖြစ်ပေမယ့် ၊ ရောင်းမထွက်တဲ့ ကလပ်တွေကတော့ ဒီအခြေအနေ အပေါ် မကျေမချမ်း ဖြစ်ကြတာ ဆန်းကြယ်ခြင်း မရှိပါဘူး ။

ချဲလ်ဆီးဟာ အခုလောလောဆယ်အထိတော့ အထက်ပါ ကစားသမား တဦးတယောက်မှ ရောင်းထုတ်နိုင်ခြင်း မရှိသေးပဲ ၊ ၃ဦးသာ ပုဂ္ဂိုလ်ရေး သဘောတူညီမှု ရသေးတာ ဖြစ်ပါတယ် ။ သို့့ပေမယ့် ဝုလ်ဗ်ကတော့ ပေါ်တူဂီ လက်ရွေးစင် ကွင်းလယ်လူ ရူဘင် နက်ဗက်စ်ကို ဆော်ဒီ ကလပ် အယ်ဟီလယ် အသင်းသို့ ပေါင် ၄၇သန်းနဲ့ ထုတ်ရောင်းဖို့ သဘောတူညီမှု ရထားပြီး ဖြစ်ပါတယ် ။

အခုလို ဆော်ဒီကလပ်များထံ မသုံးတော့တဲ့ ကစားသမားတွေကို မက်လောက်ဖွယ် ပြောင်းရွှေ့ကြေးတွေနဲ့ ထုတ်ရောင်းနေခြင်းနဲ့ ပတ်သက်ပြီး ဥရောပ ပြိုင်ဖက် ကလပ် တသင်းက ယူအီးအက်ဖ်အေထံ စုံစမ်းစစ်ဆေးမှုတွေ လုပ်ပေးဖို့ ပြောလာပါတယ် ။

အမည်မဖော်လိုတဲ့ ယင်းဥရောပကလပ် က ” PIF ဟာ ဘာစိတ်ဝင်စားစရာ အကြောင်းအရင်း တစုံတရာမှ မရှိပဲနဲ့ အသက်အရွယ် ကြီးရင့်နေတဲ့ ကစားသမားတွေ အတွက် အဆုံးမရှိတဲ့ ငွေထုတ်ကြီး ပိုက်ပြီး ရင်းနှီးမြှုပ်နှံမှုတွေ လုပ်နေပါတယ် ။ ဆော်ဒီကို FFP အထူးလွတ်ငြိမ်းခွင့် အဖြစ် အသုံးချနေတဲ့ ကလပ်တွေကိုလည်း စောင့်ကြည့်ကြပါ ။ PIF က ရောင်းတဲ့ ကလပ်တွေဖက်ကရော ၊ ဝယ်တဲ့ ကလပ်တွေဖက်ကပါ ရင်းနှီးမြှုပ်နှံမှုတွေ လုပ်ပေးနေတာ ပိုပြီး သင်္ကာမကင်း ဖြစ်စရာ ကောင်းနေပါပြီ ။ ” လို့ ထုတ်ပြောထားပါတယ် ။

PIF ဟာ နယူးကာဆယ် ပိုင်ရှင်တွေနဲ့ ဆော်ဒီကလပ် ၄သင်းတွေနဲ့ တိုက်ရိုက် ပါဝင်ပတ်သက်မှု ရှိနေပါတယ် ။ ချဲလ်ဆီးဖက်ကတော့ အခုလို ဝါရင့် ကစားသမား အချို့ကို ဆော်ဒီဆီ ထုတ်ရောင်းဖို့ လုပ်ဆောင်နေတာဟာ အရှေ့အလယ်ပိုင်းဒေသမှ လူသိများမှုနဲ့သာ သက်ဆိုင်တဲ့ အကြောင်းနဲ့ အခု အပြောင်းအရွှေ့ ဆွေးနွေးမှုတွေမှာ PIF နဲ့ ပတ်သက်မှု လုံးဝ မရှိကြောင်း ရှင်းလင်းထားပါတယ် ။