ခရစ္စတီယာနို ရိုနယ်ဒို ၊ ကာရင် ဘန်ဇီးမား တို့ကို ခေါ်ယူအပြီးမှာတော့ ဆော်ဒီ ပရိုလိဂ် ဟာ နောက်ထပ် နာမည်ကျော် ဘောလုံးစတားတွေကို ဆက်လက် ဆွဲဆောင်ဖို့ ကြိုးစား နေပါတယ် ။ ချဲလ်ဆီး ကွင်းလယ်လူ အန်ဂိုလို ကန်တီ ၊ ခံစစ်မှူး ကူလီဘာလေ နဲ့ တောင်ပံ ကစားသမား ဟာကင် ဇီယက်ချ် တို့ဟာလည်း ဆော်ဒီလိဂ် မှာ လာရောက် ကစားဖို့ ရှိနေသလို ဝုဗ် ကွင်းလယ်လူ ရူဘင်နီဗက်စ် ကိုလည်း အရှေ့အလယ်ပိုင်း ကလပ်ဆီ ရောင်းချဖို့ သဘောတူညီမှု ရရှိသွားခဲ့ ပါပြီ ။
အခုနောက်ဆုံး သတင်း ထွက်လာတဲ့ ဘောလုံးစတား ကတော့ ဆွန်ယောင်မင် ပါပဲ ။ ပရီးမီးယားလိဂ် ရဲ့ ပထမဆုံးသော အာရှသား ရွှေဖိနပ်ဆုရှင် ဖြစ်ခဲ့တဲ့ ဆွန်ယောင်မင် ကို ဆော်ဒီလိဂ် အမှတ်ပေး ချန်ပီယံ အယ် အစ်တီဟတ် အသင်းက ပေါင် ၅၁ သန်း နဲ့ ကမ်းလှမ်းထားတယ်လို့ သတင်း ပေါ်ထွက်လာခဲ့တာပဲ ဖြစ်ပါတယ် ။
အယ်လ် အစ်တီဟတ် ဟာ ဘန်ဇီးမား ကို ခေါ်ယူထားပြီး ဖြစ်သလို ချဲလ်ဆီး ကွင်းလယ်လူ ကန်တီ ကိုလည်း အခု အပတ်ထဲမှာ မိတ်ဆက်ပွဲ ပြုလုပ်ဖို့ ရှိနေပါတယ် ။
အစ်တီဟတ် ဟာ ဆွန် ကို တနှစ်လုပ်ခ ပေါင် ၂၆ သန်း ရရှိမယ့် ၄ နှစ်စာချုပ်နဲ့ ကမ်းလှမ်းထားပြီး စပါး အသင်း ဘက်ကိုတော့ ပေါင် ၅၁ သန်း နဲ့ ကမ်းလှမ်းမှု ပြုလုပ် ထားတယ်လို့ သိရပါတယ် ။
စပါး ကတော့ နည်းပြသစ် ပိုစတီကိုဂလူး ရဲ့ ဆုံးဖြတ်ချက် အပေါ်မူတည်ပြီး လုပ်ဆောင် သွားမှာ ဖြစ်ပေမယ့် ဒီဘက်နှစ်တွေမှာ အသင်းရဲ့ အားထားရတဲ့ ကစားသမားတယောက်ကို ရောင်းချပစ်ဖို့တော့ အလားအလာ နည်းပါးနိုင်တယ်လို့ သုံးသပ် ထားကြပါတယ် ။
ဆွန်ယောင်မင် ဟာ ၂၀၁၅ ခုနှစ် တုန်းက လေဗာကူဆင် အသင်းဆီကနေ တော့တင်ဟမ် ဟော့စပါး အသင်းဆီ ပြောင်းရွှေ့ လာခဲ့သူ ဖြစ်ပြီး လန်ဒန် ကလပ်အတွက် ပွဲပေါင်း ၃၇၂ ပွဲ ကစားရမှာ ၁၄၅ ဂိုးအထိ သွင်းယူပေးထား နိုင်ခဲ့ပါတယ် ။
ဆွန်နီ ဟာ ၂၀၂၁-၂၂ ရာသီတုန်းက ပရီးမီးယားလိဂ် ရွှေဖိနပ်ဆုကို ဆွတ်ခူးခဲ့ပေမယ့် မနှစ်က ရာသီမှာတော့ ခြေစွမ်းပြနိုင်ဖို့ ရုန်းကန် ခဲ့ရပြီး ရွှေဖိနပ်ဆု ရတဲ့နှစ်ကထက် ၁၃ ဂိုးလျော့နည်းခဲ့ပါတယ် ။ နောက်ပိုင်းမှာတော့ ဆွန်နီ က သူဟာ ဒဏ်ရာ အရှင်းမပျောက်သေးဘဲ ကစားခဲ့ရတာကြောင့် ရုန်းကန်ခဲ့ရတယ်လို့ ထုတ်ဖော် ပြောဆို သွားခဲ့ ပါတယ် ။
