မန်စီးတီးကွင်းလယ်ကစားသမား ရိုဒရီက တစ်ရာသီအတွင်း ပွဲ (၆၀) နီးပါး ကစားရခြင်းမှာ ကျန်းမာရေးအတွက် အဆင်မပြေကြောင်း ပြောကြားခဲ့သည်။
အသက် (၂၇)နှစ်အရွယ်ရှိ စပိန်ကွင်းလယ်ကစားသမား ရိုဒရီသည် ပြီးခဲ့သည့်ရာသီက ဖလား (၃) လုံးရ မန်စီးတီးအသင်းတွင် ပြိုင်ပွဲစုံ (၅၆) ပွဲအထိ ကစားခဲ့ပြီး (၅) ပွဲသာ လွဲချော်ခဲ့ကြောင်း သိရသည်။
၎င်းသည် ပြီးခဲ့သည့်ရာသီက မန်စီးတီးအတွက် (၄၄၆၅) မိနစ်အထိ ကစားခဲ့ရပြီး Outfield ကစားသမားထဲတွင် အများဆုံးဖြစ်ခဲ့ကြောင်းလည်း သိရှိရသည်။
ရိုဒရီက ”ပြီးခဲ့တဲ့ရာသီက ကျွန်တော် ပွဲတွေ ဘယ်လောက်အထိ ကစားခဲ့ရတယ်ဆိုတာကိုတောင် မမှတ်မိတော့ပါဘူး။ အဲဒီအတွက် အသင်းတာဝန်ရှိသူတွေ၊ နည်းပြနဲ့ ကျွန်တော် ဆွေးနွေးနေပါတယ်။ ဒါက တစ်ရာသီဆိုရင် အဆင်ပြေပေမဲ့ နှစ်ရာသီ၊ သုံးရာသီဆိုရင် အဆင်မပြေပါဘူး။ ဒါက ကျန်းမာရေးအတွက်တင်မဟုတ်ဘဲ ပွဲတွေဆက်တိုက်ကစားရခြင်းက ခန္ဓာကိုယ်ကြံ့ခိုင်မှုကိုလည်း ထိခိုက်စေပါတယ်။ ကျွန်တော်တို့ ဒါကို ဆွေးနွေးနေပါတယ်။ အမြဲတမ်း ပွဲတွေ ဆက်တိုက် ကစားနေလို့ မရပါဘူး”ဟု ပြောကြားခဲ့သည်။
