လီဗာပူးလ်အသင်းနည်းပြ ယာဂန်ကလော့ပ်က မိမိတို့အနေဖြင့် တစ်သမတ်တည်းမရှိသည့် ကစားပုံမျိုးဖြင့် ချန်ပီယံလိဂ်ဝင်ခွင့်မရနိုင်ကြောင်း လိဒ်စ်အသင်းနှင့်ပွဲအပြီးတွင် သတိပေးပြောကြားသည်။
လီဗာပူးလ်အသင်းသည် ပရီးမီးယားလိဂ် ပွဲစဉ် (၁၄) အဖြစ် စနေနေ့ ညပိုင်းက လိဒ်စ်အသင်းနှင့် ယှဉ်ပြိုင်ကစားရာ အိမ်ကွင်းမှာပင် (၁-၂) ဂိုးဖြင့် ရှုံးနိမ့်ခဲ့သည်။ ပွဲအစလေး မိနစ်မှာပင် ဂျိုးဂိုးမက်ဇ် နောက်ပြန်ပေးစဉ် ရိုဒရီဂိုရရှိသွားပြီး လူမရှိသည့်ဂိုးပေါက်ထဲသို့ အလွယ်တကူသွင်းယူကာ ဦးဆောင်ဂိုးရရှိခဲ့သည်။ ၁၄ မိနစ်တွင် ရောဘတ်ဆန်၏ဖြတ်တင်ဘောမှတစ်ဆင့် ဆာလာက ပြန်လည်ချေပသဖြင့် ပထမပိုင်းအပြီးတွင် တစ်ဂိုးစီသရေဖြစ်နေသည်။ ဒုတိယပိုင်းတွင် ဖေမီနို၏ ခေါင်းတိုက်သွင်းယူမှု၊ ဒါဝင်နူးညက်ဇ်နှင့် တစ်ဦးချင်းတွေ့စဉ် ကန်သွင်းမှုတို့ကို လိဒ်စ်အသင်းဂိုးသမား လက်စွမ်းပြကာကွယ်နိုင်ခဲ့ပြီး အနိုင်ဂိုးကို ၈၉ မိနစ်တွင် ဒတ်ချ်လူငယ်တောင်ပံကစားသမား ဆမ်းမားဗီးလ်က သွင်းယူပေးခဲ့ခြင်းဖြစ်သည်။
လီဗာပူးလ်အသင်းအနေဖြင့် ပြီးခဲ့သည့်တစ်ပတ်တွင် အမှတ်ပေးဇယား အောက်ဆုံးနေရာမှ နော်တင်ဟမ်အသင်းကို အဝေးကွင်း၌ (၁-ဝ) ဂိုးဖြင့် ရှုံးနိမ့်ခဲ့သလို ယခုတစ်ပတ်တွင်လည်း တန်းဆင်းဇုန်အတွင်းမှ လိဒ်စ်အသင်းအား အိမ်ကွင်းမှာပင် (၁-၂) ဂိုးဖြင့် ထပ်မံရှုံးနိမ့်ခဲ့ခြင်းဖြစ်သည်။
သို့ဖြစ်ရာ လီဗာပူးလ်အသင်းသည် ၁၂ ပွဲကစားပြီးနောက် ၁၆ မှတ်သာရရှိထားပြီး ဇယားထိပ်ဆုံးရောက်ရှိနေသည့် အာဆင်နယ်အသင်းနှင့် (၁၅)မှတ်အထိ ကွာဟနေသည်။
လိဒ်စ်အသင်းမှာမူ လီဗာပူးလ်အသင်းအား အနိုင်ရခဲ့သော ကြောင့် ရမှတ် ၁၂ မှတ်ဖြင့် တန်းဆင်းဇုန်အထက် အဆင့် ၁၅ နေရာအထိပြန်လည်တက်ရောက်နိုင်ခဲ့သည်။
“အခုအချိန်မှာ ကျွန်တော်တို့ ကစားနေသလို တစ်သမတ်တည်း မရှိတဲ့ပုံစံမျိုး ကစားနေရင်တော့ ချန်ပီယံလိဂ်ဝင်ခွင့်ရမှာ မဟုတ်ပါဘူး။ ကျွန်တော်တို့ ဒါကို ပြင်ဆင်ရပါမယ်။ ဒီအခြေအနေမှာ ကျွန်တော်တို့ပုံစံမဟုတ်တာတွေ အများကြီးပဲဖြစ်နေတယ်။ အခုလိုဖြစ်သွားတဲ့အတွက် ကျွန်တော်စိတ်မကောင်းပါဘူး။ ဒါပေမဲ့ ဒါက အခြေအနေတစ်ခုပါ။ ခင်ဗျားအနေနဲ့ ဘယ်လောက်အထိ နက်နက်ရှိုင်းရှိုင်းတူးဆွနိုင်မလဲဆိုတာ ကျွန်တော်သေချာမသိပါဘူး။ ဒါပေမဲ့ ကျွန်တော်တို့ကတော့ လုပ်နိုင်ပါတယ်။ ကျွန်တော်တို့ ဒါကိုဖြေ ရှင်းနိုင်ဖို့အတွက် အလုပ်တွေလုပ်ရပါမယ်။ ဒီပွဲကို အရင်ဆုံးကြည့်ရပါမယ်။ သေချာနားလည်နိုင်အောင် ကြိုးစားပြီးရင် အဲဒီကနေ ဆက်သွားရမယ်။ ချာတိတ်တွေက ကြိုးစားခဲ့ပါ တယ်။ ဘောလုံးပိုင်ဆိုင်မှုကောင်းမွန်သလို အခွင့်အရေးကောင်းတွေလည်း အများကြီးရခဲ့ပါတယ်။ ဒါပေမဲ့ ဒုတိယဂိုးလိုပုံစံမျိုးကို ကာကွယ်နိုင်ခဲ့ရင် အဆုံးသတ်မှာ (၁-၁) ဂိုးစီနဲ့ ပြီးဆုံးခဲ့မှာပါ” ဟု ကလော့ပ်က ပွဲအပြီးတွင် ပြောကြားသည်။
လီဗာပူးလ်အသင်းသည် လာမည့်အင်္ဂါနေ့တွင် နာပိုလီအသင်းနှင့် ချန်ပီယံလိဂ် အုပ်စုပထမနေရာ အဆုံးအဖြတ်အဖြစ် အိမ်ကွင်းပွဲ ကစားရမည်ဖြစ်သည်။
