၂၀၂၁ မလေးရှားဖလားပြိုင်ပွဲ ကွာတားဖိုင်နယ် ပထမအကျော့ပွဲစဉ်များကို ပြီးခဲ့သည့် နိုဝင်ဘာ (၁၄) ရက်က ကျင်းပရာ မြန်မာလူငယ်တိုက်စစ်မှူး ဟိန်းထက်အောင်၏ ဆီလန်ဂေါအသင်းမှာ ကွာလာလမ်ပူစီးတီးအသင်းကို (၀-၂) ဂိုးဖြင့် ရှုံးနိမ့်ခဲ့ကြောင်း သိရသည်။
ယင်းပွဲတွင် ဟိန်းထက်အောင်မှာ ဆီလန်ဂေါအသင်းအတွက် ပွဲချိန်ပြည့်ကစားခွင့်ရရှိခဲ့သော်လည်း ဂိုးသွင်းယူပေးနိုင်ခြင်းမရှိခဲ့ကြောင်း သိရသည်။
၂၀၂၁ မလေးရှားဖလားပြိုင်ပွဲကို အုပ်စုအဆင့်မှစ၍ အိမ်ကွင်း၊ အဝေးကွင်း နှစ်ကျော့စနစ်ဖြင့်ကျင်းပနေခြင်း ဖြစ်သည်။
ဆီလန်ဂေါအသင်းသည် ကွာတားဖိုင်နယ် ပထမအကျော့ကို အိမ်ကွင်း၌ ကစားခွင့်ရရှိခဲ့သော်လည်း ရှုံးနိမ့်ခဲ့ခြင်း ဖြစ်သည်။
ဆီလန်ဂေါအသင်းသည် နိုဝင်ဘာ (၁၈) ရက်တွင် ကွာတားဖိုင်နယ် ဒုတိယအကျော့ပွဲစဉ်အဖြစ် ကွာလာလမ်ပူစီးတီးအသင်း၏ အိမ်ကွင်းသို့သွားရောက်ကစားရမည်ဖြစ်သည်။
ဆီလန်ဂေါအသင်းသည် အိမ်ကွင်း၌ (၂) ဂိုးပြတ်ရှုံးနိမ်ထားပြီး ဒုတိယအကျော့ကို အဝေးကွင်းသွားကစားရမည်ဖြစ်၍ ဆီမီးဖိုင်နယ်သို့ တက်ရောက်ရန် ခက်ခဲနိုင်ဖွယ်ရှိနေသည်။
ဟိန်းထက်အောင်သည် ဆီလန်ဂေါအသင်း၏ မလေးရှားဖလားပြိုင်ပွဲရလဒ်အခြေအနေပေါ်မူတည်၍ တူရကီနိုင်ငံသို့ ရောက်ရှိနေသည့် မြန်မာ့လက်ရွေးစင်အသင်းနှင့် သွားရောက်ပူးပေါင်းရမည်ဖြစ်သည်။
