ရီးယဲလ်အသင်းက ဘရာဇီးလ်တိုက်စစ်ကစားသမား ဗင်နီစီယပ်စ်အနေဖြင့် တံကောက်ကြောဒဏ်ရာကြောင့် (၄)ပတ်မှ(၆)ပတ်အထိ အနားယူရမည်ဖြစ်ကြောင်း အတည်ပြုကြေညာခဲ့သည်။
ဗင်နီစီယပ်စ်(၂၃ နှစ်)သည် ၀ါရင့်တိုက်စစ်မှူး ဘန်ဇီမာ အသင်းမှထွက်ခွာသွားသည့်အတွက် လက်ရှိအချိန်တွင် ရီးယဲလ်အသင်း၏ တိုက်စစ်ပိုင်းကို ဦးဆောင်နေရသူဖြစ်ပြီး ယခုတစ်ပတ် ဆယ်လ်တာဗီဂိုအသင်းနှင့် ယှဉ်ပြိုင်ကစားခဲ့သည့် လာလီဂါပွဲစဉ်တွင် ဒဏ်ရာပြဿနာနှင့် ရင်ဆိုင်ခဲ့ရခြင်းဖြစ်သည်။
အဆိုပါပွဲတွင် ဗင်နီစီယပ်စ်သည် ပွဲအစ(၁၈) မိနစ်မှာပင် လူစားလဲခံခဲ့ရပြီး နည်းပြ အန်ဆယ်လော့တီက အသေးစားဒဏ်ရာပြဿနာသာဖြစ်လိမ့်မည်ဟု အစောပိုင်းတွင် သုံးသပ်ခဲ့သည်။ သို့ သော် စမ်းသပ်စစ်ဆေးမှုများအရ တံကောက်ကြောဒဏ်ရာဖြစ်သည့်အတွက် (၄)ပတ်မှ (၆)ပတ်အထိ အနားယူရမည်ဟု ရီးယဲလ်အသင်းက ကြေညာခဲ့ခြင်းဖြစ်သည်။
ထို့ကြောင့် ဗင်နီစီယပ်စ်သည် ရီးယဲလ်အသင်း၏ လာလီဂါပွဲစဉ်(၆) ပွဲခန့်ကို လွဲချော်ဖွယ်ရှိနေသလို၊ စက်တင်ဘာလ နိုင်ငံတကာရက်သတ္တပတ်အတွင်း ယှဉ်ပြိုင်ကစားရမည့် ဘရာဇီးလ်လက်ရွေးစင်အသင်း၏ ကမ္ဘာ့ဖလားခြေစစ်ပွဲစဉ်(၂)ပွဲကိုလည်း လွဲချော်မည်ဖြစ်ကြောင်း သိရသည်။
ထို့ပြင် ချန်ပီယံလိဂ်အုပ်စုအဆင့်အဖွင့်ပွဲစဉ်ကိုလည်း စက်တင်ဘာလအတွင်း စတင်ယှဉ်ပြိုင်ရမည် ဖြစ်သောကြောင့် ဗင်နီစီယပ်စ်အနေဖြင့် ယင်းပွဲစဉ်ကိုလည်း လွဲချော်ဖွယ်ရှိနေကြောင်း သိရသည်။
