အာဆင်နယ်အသင်းသည် အင်္ဂလန်ကွင်းလယ်ကစားသမား ဒက်ကလန်ရိုက်အတွက် ဝက်စ်ဟမ်းအသင်းထံ ထပ်မံကမ်းလှမ်းမှု ပြုလုပ်သွားရန် စီစဉ်နေကြောင်း Daily Mail က ဖော်ပြခဲ့သည်။
အာဆင်နယ်အသင်းသည် ဒက်ကလန်ရိုက်စ်အတွက် ပေါင်သန်း(၈၀)ဖြင့် ပထမဆုံးအကြိမ် ကမ်းလှမ်းခဲ့ရာ ဝက်စ်ဟမ်းအသင်းဘက်က ပယ်ချခဲ့ကြောင်း သိရှိရသည်။
ဝက်စ်ဟမ်းအသင်းက ၎င်းတို့၏ ကစားသမားအတွက် အနည်းဆုံးပေါင်သန်း (၉၀)ရရှိရန် လိုလားနေသောကြောင့် ပယ်ချခံခဲ့ရခြင်းဖြစ်ပြီး Add-ons ကြေးများကိုပါ ထည့်တွက်ပါက ဒက်ကလန်ရိုက်စ်၏ အပြောင်းအရွှေ့မှာ ပေါင်သန်း(၁၀၀)ကျော်ရှိလိမ့်မည်ဟု ဗြိတိန်မီဒီယာများက သုံးသပ်ထားသည်။
၎င်းကို အခြားထိပ်သီးအသင်းများကလည်း စိတ်ဝင်စားနေသောကြောင့် အာဆင်နယ်အသင်းက ကြေးတိုးမြှင့်ကမ်းလှမ်းရန် စီစဉ်နေခြင်းဖြစ်ကြောင်း သိရသည်။
ပြီးခဲ့သည့်ရာသီက ပရီးမီးယားလိဂ်တွင် အဆင့် (၂) နေရာ ရပ်တည်နိုင်ခဲ့သည့် အာဆင်နယ်အသင်းသည် ယခုနွေတွင် ကစားသမားသစ် ခေါ်ယူမှုအတွက် ပေါင်သန်း (၂၀၀) ကျော် အသုံးပြုဖွယ်ရှိနေကြောင်းလည်း သိရသည်။
