နိုဝင်ဘာလ ၈ ရက်က နယူးကာဆယ် အသင်းနည်းပြသစ်အဖြစ် တရားဝင်ခန့်အပ် ခြင်းခံခဲ့ရသည့် အင်္ဂလိပ်လူမျိုးနည်းပြ အက်ဒီဟောင်းက သူ့အတွက် အံ့အားသင့်စရာကောင်းသည့် အခွင့်အလမ်းဖြစ်သည်ဟု ဝန်ခံပြောကြားခဲ့သည်။
“ဒါက(နယူးကာဆယ်နည်းပြသစ်အဖြစ် ခန့်အပ်ခံရမှုအပေါ်) အံ့အားသင့်စရာကောင်းတဲ့ အခွင့်အလမ်းတစ်ခုပါပဲ။ ဒါပေမဲ့ ရှေ့မှာတော့ ကျွန်တော်တို့ အလုပ်တွေ အများအပြား လုပ်ဆောင်ရတော့မှာပါ။ လေ့ကျင့်ရေးကွင်းမှာ ကစားသမားတွေနဲ့အတူ အလုပ်စတင်လုပ်ဖို့ စိတ်အားထက်သန်နေပါတယ်။ ဒီအခွင့်အလမ်းအတွက် ကလပ်အသင်းပိုင်ရှင်တွေကို ကျေးဇူးတင်ပါတယ်။ မယုံကြည်နိုင်လောက်စရာ ကြိုဆိုခဲ့ကြတဲ့ ကလပ်အသင်းပရိသတ်တွေကိုလည်း ကျေးဇူး တင်ကြောင်း ပြောလိုပါတယ်။ ကျွန်တော်တို့ ရဲ့ခရီးကို အတူတကွစတင်ရမှာဖြစ်လို့ အရမ်းစိတ်လှုပ်ရှားမိပါတယ်”ဟု နည်းပြသစ်အဖြစ် ခန့်အပ်ခံရပြီးနောက် အက်ဒီဟောင်းက နယူးကာဆယ်အသင်းဝက်ဘ်ဆိုက်သို့ ပြောကြားခဲ့သည်။
နယူးကာဆယ်အသင်းသည် အသင်းပိုင်ရှင်အပြောင်းအလဲဖြစ်ပေါ်ခဲ့ပြီးနောက် နည်းပြ စတိဗ်ဘရုစ်ကို ရာထူးမှ ထုတ်ပယ်ခဲ့ပြီး အက်ဒီဟောင်းကို အစားထိုး ခန့်အပ်ခဲ့ခြင်းဖြစ်သည်။ နယူးကာဆယ်အသင်းတာဝန်ရှိသူများသည် ထိပ်တန်းနည်းပြ များကို ခန့်အပ်နိုင်ရန် ကြိုးပမ်းခဲ့သော်လည်း အောင်မြင်မှုမရသည့်အတွက် လူငယ်နည်းပြ အက်ဒီဟောင်းကိုသာ ခန့်အပ်ခဲ့ခြင်းဖြစ်ကြောင်း သိရသည်။
အက်ဒီဟောင်း(၄၃ နှစ်)သည် ပြီးခဲ့သည့်နှစ်သြဂုတ်လက ဘုန်းမောက် အသင်းနှင့် လမ်းခွဲခဲ့ပြီးကတည်းက အသင်းလက်မဲ့ဖြစ်နေသူဖြစ်ပြီး ကြားကာလအတွင်း ဆဲလ်တစ်အသင်း၏ကမ်းလှမ်းမှုကို ပယ်ချခဲ့ကြောင်းလည်း သိရသည်။ အက်ဒီဟောင်းသည် ဘရိုက်တန်နှင့် နယူး ကာဆယ်အသင်း၏ပွဲစဉ်ကို လိုက်လံကြည့်ရှုခဲ့ပြီးနောက် နိုဝင်ဘာလ ၈ ရက်တွင် နယူးကာဆယ်နည်းပြသစ်အဖြစ် ၂၀၂၄ ခုနှစ်အထိ စာချုပ်ချုပ်ဆိုခဲ့ခြင်းဖြစ်သည်။
နယူးကာဆယ်အသင်းသည် နည်းပြသစ်ရှာဖွေမှုကို နည်းပြဟောင်း စတိဗ်ဘရုစ် နှင့်လမ်းခွဲပြီးနောက် ချက်ချင်းပြုလုပ်ခဲ့ပြီး လက်ရှိ ဗီလာရီးယဲလ်အသင်းကို ကိုင်တွယ် နေသည့် အူနိုင်းအမ်မရီကို ကမ်းလှမ်းမှုများ ပြုလုပ်ခဲ့သော်လည်း ပယ်ချခဲ့သောကြောင့် အက်ဒီဟောင်းကိုသာ နည်းပြသစ်အဖြစ် အစားထိုးခဲ့ခြင်းဖြစ်သည်။ နယူးကာဆယ်အ သင်းပူးတွဲပိုင်ရှင်ဖြစ်သူ စတာဗယ်လေက အက်ဒီဟောင်းသည် စိတ်အားထက်သန်မှု ပြင်းပြပြီး ပေါက်ကွဲအားပြင်းသည့် နည်းပြ တစ်ဦးဖြစ်သည်ဟု ချီးကျူးခဲ့သည်။ ထို့ပြင် နယူးကာဆယ်အသင်း တည်ဆောက်မှုဖြစ် စဉ်တွင် အက်ဒီဟောင်းသည် အံဝင်ခွင်ကျ ဖြစ်လိမ့်မည်ဟုလည်း သုံးသပ်ခဲ့သည်။
နယူး ကာဆယ်အသင်းကို ဆော်ဒီကျောထောက် နောက်ခံပြု ရင်းနှီးမြှုပ်နှံမှုအဖွဲ့က ပေါင် ၃၀၅ သန်းဖြင့် ဝယ်ယူထားခြင်းဖြစ်ပြီး လာမည့် အပြောင်းအရွှေ့ကာလတွင် အသင်းကို အ ပြောင်းအလဲများစွာ ပြုလုပ်သွားဖွယ်ရှိနေ သည်။ အက်ဒီဟောင်းသည် နယူးကာဆယ်အသင်းတွင် ဘုန်းမောက်အသင်း၌ လက်တွဲ ခဲ့ဖူးသော ကစားသမားများဖြစ်သည့် ကာလမ်ဝီလ်ဆင်၊ ဖရေဆာ၊ ရစ်ချီတို့နှင့် ပြန်လည် လက်တွဲရမည်ဖြစ်ပြီး နိုဝင်ဘာ ၂၀ တွင် ဘရန့်ဖို့ဒ်နှင့်ပွဲကို စတင်ကိုင်တွယ်မည်ဖြစ်သည်။
