ပရီးမီးယားလိဂ်အပါအဝင် အင်္ဂလန်အမှတ်ပေးပွဲစဉ်များကို ရွှေ့ဆိုင်းနေခြင်းများအား ရပ်တန့်သင့်ပြီဟု ဂယ်ရီနဗီးလ် မှတ်ချက်ပြု

မန်ယူအသင်းနှင့် အင်္ဂလန်လက်ရွေးစင်အသင်း၏ နောက်ခံလူဟောင်းတစ်ဦးဖြစ်သူ ဂယ်ရီနဗီးလ်က ကိုရိုနာဗိုင်းရပ်စ်အကြောင်းပြချက်ဖြင့် ပရီးမီးယားလိဂ်အပါအဝင် အင်္ဂလန်အမှတ်ပေးပွဲစဉ်များကို ရွှေ့ဆိုင်းနေခြင်းများအား ရပ်တန့်သင့်ပြီဟု မှတ်ချက်ပြုလိုက်သည်။

ဂယ်ရီနဗီးလ်က သူ၏ Twitter စာမျက်နှာတွင် အလွန်ထူးခြားသော အကြောင်းအရာမှလွဲ၍ ပရီးမီးယားလိဂ်နှင့် အင်္ဂလန်အောက်တန်းလိဂ်(EFL)ပြိုင်ပွဲများကို ဖျက်သိမ်း(ရွှေ့ဆိုင်း)နေခြင်းအား ရပ်တန့်သင့်ကြောင်း၊ ကလပ်အသင်းတိုင်းအနေဖြင့် လူငယ်အသင်းများမှ ကစားသမားများအပါအဝင် ကစားသမားအနည်းဆုံး(၄၀၊ ၅၀)ဦးခန့်ရှိကြောင်း၊ အကယ်၍ Carabao Cup (လိဂ်ဖလားပြိုင်ပွဲ)သာ ဖြစ်ခဲ့မည်ဆိုပါက ကလပ်အသင်းများအနေဖြင့် ပထမကစားသမား(၁၁)ဦးမဟုတ်သည့် ကစားသမားများဖြင့် ယှဉ်ပြိုင်လိမ့်မည်ဖြစ်ကြောင်း ရေးသားခဲ့သည်။

ပြီးခဲ့သည့် ဒီဇင်ဘာလနှင့် နှစ်သစ်ကူးကာလ ပွဲစဉ်များတွင် ကိုရိုနာဗိုင်းရပ်စ်အကြောင်းပြချက်ဖြင့် ရွှေ့ဆိုင်းခဲ့ရသော ပရီးမီးယားလိဂ်ပွဲမှာ (၁၆)ပွဲအထိ ရှိခဲ့သည်။

ဒီဇင်ဘာ (၁၂)ရက်နေ့တွင် ကစားရန်ရှိသော ဘရိုက်တန်-စပါးပွဲမှစ၍ ဒီဇင်ဘာ(၃၀)ရက်နေ့တွင် ကစားမည့် အဲဗာတန်-နယူးကာဆယ်ပွဲအထိ ပွဲအချို့ကိုရွှေ့ဆိုင်းထားရပြီး ဂယ်ရီနဗီးလ်က ရှေ့လာမည့်ပွဲများတွင် ပွဲမရွှေ့ဆိုင်းဘဲ လူငယ်ကစားသမားများဖြင့် ယှဉ်ပြိုင်စေရန် တာဝန်ရှိသူများကို တွန်းအားပေးခဲ့ခြင်းဖြစ်သည်။

ဂယ်ရီနဗီးလ်က သူ၏အသင်းဟောင်း မန်ယူအသင်းအနေဖြင့်လည်း ပြီးခဲ့သည့် ဘရန့်ဖို့ဒ်၊ ဘရိုက်တန်တို့နှင့် ကစားရမည့်ပွဲများကို မရွှေ့ဆိုင်းခဲ့သင့်ဘဲ ကစားခဲ့သင့်သည်ဟု ဝေဖန်ခဲ့သည်။

ပရီးမီးယားလိဂ်ဘုတ်အဖွဲ့က သတ်မှတ်ထားသောစည်းမျဉ်းတွင် အသင်းတစ်သင်းအနေဖြင့် ဂိုးသမားတစ်ဦးအပါအဝင် ကစားသမား(၁၄)ဦး စာရင်းမသွင်းနိုင်ပါက ပွဲကို ရွှေ့ဆိုင်းနိုင်ကြောင်း ဖော်ပြထားသည်။