ကမ္ဘာ့ဖလားဆုရှင်မက်ဆီသည်ယခုနှစ်ဘောလုံးရာသီအကုန်တွင် ပဲရစ်ဆက်နေရန် မသေချာဖြစ်နေကြောင်း အမေရိကန်ကလပ် အင်တာမိုင်ယာမီသည် မက်ဆီကိုခေါ်ယူရန် နီးစပ်နေကြောင်း သတင်းများထွက်ပေါ်လာသည်။
မက်ဆီသည်လက်ရှိဘောလုံးရာသီအကုန်တွင် အသင်းနှင့်စာချုပ်သက်တမ်းကုန်ဆုံးမည်ဖြစ်ပြီး စာချုပ်သက်တမ်းတိုးရေးဆွေးနွေးမှုမှာလည်း အောင်မြင်မှုမရဖြစ်နေသည်။ မက်ဆီသည် ပဲရစ်တွင် ဆက်နေရေးကို ပို၍ မသေချာဖြစ်လာနေပြီး အင်တာမိုင်ယာမီသည် ၎င်းကို ခေါ်ယူရေးတွင် အခြေအနေကောင်းနေကြောင်း ပြင်သစ်ဘောလုံးမဂ္ဂဇင်းတစ်ခုက ဖော်ပြသည်။
အမေရိကန်မေဂျာလိဂ်သည် ကမ္ဘာ့ဘောလုံးလောကတွင် နာမည်ရလာပြီး မက်ဆီကဲ့သို့ ဘောလုံးပုံရိပ်တစ်ခုက အမေရိကန်သို့ ပြောင်းရွှေ့ဖြစ်ပါက စိတ်လှုပ်ရှားစရာ ဖြစ်လာမည်ဖြစ်ကြောင်း သတင်းများက ဆက်လက်ဖော်ပြသည်။ အင်တာမိုင်ယာမီအသင်းကို ဘက်ဟမ်းက ပူးတွဲပိုင်ဆိုင်ပြီး ၎င်း၏ သူငယ်ချင်း ဖီးလ်နဗီးလ်က နည်းပြချုပ်အဖြစ်ဆောင်ရွက်နေသည်။ မက်ဆီ၏မိသားစုသည် အမေရိကန်တွင်နေရာသည်ကို နှစ်ခြိုက်ပြီး အားလပ်ရက်များတွင် အမေရိကန်သို့ သွားရောက်လည်ပတ်ကြောင်းလည်း သတင်းများက ဆက်လက်ဖော်ပြသည်။
