စပါးအသင်းနည်းပြ မော်ရင်ဟိုက လက်စတာတိုက်စစ်မှူး ဗာဒီမှာ ပြိုင်ဘက်များကို အလွန်ဒုက္ခပေးနိုင်သည့် ကစားသမားဖြစ်သည်ဟု ချီးကျူးပြောကြားခဲ့သည်။
စပါးအသင်းသည် ဒီဇင်ဘာ (၂၀) ရက်နေ့တွင် ပရီးမီးယားလိဂ်ပွဲစဉ် (၁၄)အဖြစ် လက်စတာအသင်းကို အိမ်ကွင်းတွင် လက်ခံကစားရမည်ဖြစ်သည်။
မော်ရင်ဟိုက “ဗာဒီက အရမ်းအန္တရာယ်များတဲ့ ကစားသမားပါ။ သူက အရည်အချင်းပြည့်ဝသူဖြစ်ပြီး ဘယ်နည်းပြလက်အောက်မှာ ကစားသည်ဖြစ်စေ ပြိုင်ဘက်အသင်းကို အခက်တွေ့စေသူပါ။ သူ ပရီးမီးယားလိဂ်ကို ရောက်လာတာ နောက်ကျလို့ ကျွန်တော် စိတ်မကောင်းဖြစ်တယ်။ သူသာ ကစားသမားဘဝ အစောပိုင်းမှာကတည်းက ပရီးမီးယားလိဂ်ကို ရောက်လာခဲ့မယ်ဆိုရင် ဂိုးတွေသွင်းပြီး သမိုင်းတွေ ရေးနိုင်မယ် ထင်တယ်။ သူက တကယ်တော်တဲ့ ကစားသမားပါ။ ကျွန်တော်သာ နောက်ခံလူတစ်ဦးဖြစ်ခဲ့မယ်ဆိုရင်တော့ အန္တရာယ်များလွန်းတဲ့ ဗာဒီနဲ့ ထိပ်တိုက်တွေ့ဆုံရမှာကို မလိုလားပါဘူး”ဟု ပြောကြားခဲ့သည်။
ဗာဒီသည် အသက် (၂၆)နှစ်အရွယ်ဖြစ်သည့် ၂၀၁၄-၁၅ ရာသီတွင်မှ လက်စတာအသင်းနှင့်အတူ ပရီးမီးယားလိဂ်ပြိုင်ပွဲတွင် စတင်ကစားခွင့်ရခဲ့ခြင်းဖြစ်သည်။
လက်ရှိတွင် အသက် (၃၃)နှစ်ကျော်နေဖြစ်သည့် အင်္ဂလန်ဝါရင့်တိုက်စစ်မှူး ဗာဒီသည် ပရီးမီးယားလိဂ်ပြိုင်ပွဲတွင် (၁၁၃)ဂိုး သွင်းယူထားပြီး ယခုရာသီ ပရီးမီးယားလိဂ် (၁၁)ပွဲကစားရာတွင် (၁၀)ဂိုးအထိ သွင်းယူပေးထားသည်။
