ဘာစီလိုနာနှင့် အင်တာမိုင်ယာမီတို့၏ စိတ်ဝင်စားခြင်းခံနေရသော်လည်း PSG အသင်းတွင် မက်ဆီ ဆက်နေဖွယ်ရှိပြီး စာချုပ်သစ်ချုပ်ဆိုရန်အတွက် အသင်းတာဝန်ရှိသူများနှင့် မက်ဆီ၏ဖခင် ဆွေးနွေး

PSG အသင်းတိုက်စစ်မှူး မက်ဆီသည် အသင်းဟောင်း ဘာစီလိုနာနှင့် အင်တာမိုင်ယာမီအသင်းတို့၏ စိတ်ဝင်စားခြင်းကို ခံနေရသော်လည်း PSG အသင်းတွင်သာ ဆက်နေဖွယ်ရှိနေပြီး စာချုပ်သစ်ချုပ်ဆိုရန်အတွက် အသင်းတာဝန်ရှိသူများနှင့် မက်ဆီ၏ဖခင် ဖြစ်သူ ဟော်ဟဲမက်ဆီတို့ ဆွေးနွေးနေကြောင်း သိရသည်။ 

အသက် ၃၅ နှစ်အရွယ်ရှိ အာဂျင်တီးနားလက်ရွေးစင်တိုက်စစ်မှူး မက်ဆီသည် ယခုရာသီကုန်တွင် အသင်းနှင့် စာချုပ်သက်တမ်းကုန်ဆုံးမည်ဖြစ်ပြီး ၎င်းကိုခေါ်ယူရန် အသင်းဟောင်း ဘာစီလိုနာနှင့် နာမည်ကျော် ဘောလုံးသမားဟောင်း ဒေးဗစ်ဘက်ခမ် ပူး တွဲပိုင်ဆိုင်သည့် အမေရိကန် မေဂျာလိဂ်ကလပ် အင်တာမိုင်ယာမီအသင်းတို့က စိတ်ဝင်စားနေကြောင်း သိရသည်။ 

ထို့ပြင် စီရော်နယ်လ်ဒိုကို ခေါ်ယူပြီးနောက် ဘောလုံးပရိသတ်များ၏ စိတ်ဝင်စားခြင်းခံနေရသည့် ဆော်ဒီလိဂ်ကလည်း မက်ဆီကို ခေါ်ယူရန် ပစ်မှတ်ထားနေကြောင်း သိရှိရသည်။ သို့သော် မက်ဆီသည် အပြောင်းအရွှေ့ကိစ္စအတွက် အခြားကလပ်အသင်းများနှင့် ဆွေးနွေးမှုမရှိကြောင်း သိရှိရသည်။ 

PSG အသင်းသည် မက်ဆီအား စာချုပ်သစ်ချုပ်ဆိုရန် ပြီးခဲ့သည့်ခရစ္စမတ်ကာလကတည်းက ကမ်းလှမ်းခဲ့ပြီး မက်ဆီအနေဖြင့်လည်း ပြင်သစ်တွင်ဆက်နေရန် ဆန္ဒရှိနေကြောင်း သိရသည်။ ဗြိတိန်သတင်းစာ Daily Mail ၏ ဖော်ပြမှုအရ မက်ဆီ၏အေးဂျင့်အဖြစ် ဆောင်ရွက်နေသည့် ဖခင်ဖြစ်သူ ဟော်ဟဲမက်ဆီသည် ဖေဖော်ဝါရီ ၁၇ ရက် (သောကြာနေ့) တွင် PSG အသင်း၏ အားကစားဒါရိုက်တာ အိုကမ်ပို့စ်အပါအဝင် အသင်းတာဝန်ရှိသူများနှင့်တွေ့ဆုံကာ မက်ဆီ၏စာချုပ်သစ်အတွက် ဆွေးနွေးခဲ့ကြကြောင်း သိရသည်။ 

မက်ဆီအနေဖြင့် PSG အသင်းနှင့် နောက်ထပ် နှစ်နှစ်သက်တမ်းရှိ စာချုပ်သစ်တစ်ရပ် ချုပ်ဆိုသွားဖွယ်ရှိနေပြီး လာမည့် ရက်သတ္တပတ်များတွင် ယင်းအတွက် ဆွေးနွေးမှုများ ခပ်စိတ်စိတ်လုပ်လာဖွယ်ရှိနေကြောင်းလည်း Daily Mail က ဖော်ပြခဲ့သည်။