ဘာစီလိုနာနှင့် မန်ယူအသင်းတို့ ယှဉ်ပြိုင်ကစားခဲ့သည့်ပွဲစဉ်မှ ဒိုင်လူကြီး မာရီယာနီ၏ ဆုံးဖြတ်ချက်များကို နှစ်ဖက်အသင်းနည်းပြများဖြစ်သည့် ဇာဗီနှင့် အဲရစ်တန်ဟက်ဂ်တို့က ဝေဖန်ပြစ်တင်ခဲ့ကြောင်း သိရသည်။
ယူရိုပါလိဂ် ၃၂ သင်းအဆင့် ပထမအကျော့အဖြစ် ကြာသပတေးနေ့ ညပိုင်းက နူးကမ့်ကွင်း၌ ယှဉ်ပြိုင်ကစားသည့်ပွဲတွင် ဘာစီလိုနာနှင့် မန်ယူအသင်းတို့ (၂-၂) ဂိုးစီ သရေကျခဲ့သည်။ ဧည့်သည်မန်ယူအသင်းက (၁-၂) ဂိုးဖြင့် ဦးဆောင်ကစားနေစဉ် တိုက် စစ်မှူး ရပ်ရှ်ဖို့ဒ်ကို ဘာစီလိုနာနောက်ခံလူ ခွန်ဒဲ တားဆီးခဲ့သော်လည်း အီတလီဒိုင်လူကြီး မာရီယာနီက ပြစ်ဒဏ်ဘောပေးရန် ငြင်းဆန်ခဲ့ပြီး ယင်းဆုံးဖြတ်ချက်ကို ဝေဖန်ခဲ့သည့် တန်ဟက်ဂ်ကိုသာ အဝါကတ်ပြသခဲ့သည်။
သို့ဖြစ်ရာ တန်ဟက်က “ကျွန်တော့်အနေနဲ့ ထောက်ပြစရာဆိုရင် (၂-၁) ဂိုးဖြစ်နေချိန်မှာ အဲဒါက ပွဲအပေါ် ကြီးမားတဲ့ သက်ရောက်မှုဖြစ်စေပါတယ်။ ဒါက မားကပ်စ်ရပ်ရှ်ဖို့ဒ်ကို သိသိသာသာ ပြစ်ဒဏ်ကျူးလွန်ခဲ့တာပါ။ အဲဒါက ပယ်နယ်တီဧရိယာအထဲမှာလား၊ အပြင်မှာလားဆိုတာ ကျွန်တော်တို့ ဆွေးနွေးလို့ ရပါတယ်။ ဒါပေမဲ့ အဲဒါက အနီကတ်ဆိုတာတော့ သေချာပါတယ်။ ဘာကြောင့်လဲဆိုတာ ကျွန်တော် ဒိုင်လူကြီးကိုမေးခဲ့တယ်။ အဲဒါက ပယ်နယ်တီဧရိယာအပြင်ဘက်မှာ ဖြစ်ပြီး ပြစ်ဒဏ်ဘောမဟုတ်ဘူးလို့ သူက ပြောခဲ့တယ်။ စည်းကြပ်ဒိုင်နဲ့ ကွင်းလယ်ဒိုင်က ဒီအခြေအနေကို သေချာမြင်ရတဲ့အနေအထားမှာရှိနေတယ်။ ပြီးတော့ ကျွန်တော်တို့ဆီမှာ VAR လည်းရှိနေတယ်လို့ ထင်တယ်။ ဒါကမကောင်းပါဘူး။ တကယ်ဆိုးရွားတဲ့ ဆုံးဖြတ်ချက်ပဲလို့ ကျွန်တော်ထင်တယ်။ ကျွန်တော် နားမလည်နိုင်ပါဘူး။ ဘာကာရဲ့ဖိအားတွေကြောင့် သူတို့ဖိစီးနေတာလည်းဖြစ်နိုင်တယ်။ အဲဒါက ကြီးမားတဲ့ လွှမ်းမိုးမှုပါ။ ဒီ ကစားပွဲတင်မဟုတ်ဘဲ ပွဲစဉ်တစ်ခုလုံးကိုပါ ရှိနေတာပါ။ ဒိုင်တွေအနေနဲ့ ဒီလိုအမှားမျိုး လုပ်လို့မရပါဘူး” ဟု ပြောကြားခဲ့သည်။
ထို့ပြင် ပွဲပြီးခါနီး ၁၀ မိနစ်ဝန်းကျင်အလိုတွင် မန်ယူအသင်းကွင်းလယ်လူ ဖရက်ဒ် လက်ထိခဲ့ခြင်းအတွက် ဇာဗီက “အဲဒါက ပယ်နယ်တီပါ။ ကျွန်တော့်အတွက်တော့ ဒါက သေချာပေါက် ပယ်နယ်တီပေးရမှာပါ။ ဒီ အနေအထားက ပုံမှန်မဟုတ်ပါဘူး။ လုံးဝ သေချာပါတယ်။ မီလန်မှာကစားတဲ့ ချန်ပီယံလိဂ်ပွဲရော အခုပွဲမှာပါ အဲဒီလိုဖြစ်ခဲ့တာပါ။ ပယ်နယ်တီမပေးခဲ့တာက မယုံနိုင်စရာပါပဲ” ဟု ဝေဖန်ခဲ့သည်။
