ဘာစီလိုနာအသင်းနည်းပြ ဇာဗီက အသင်းနှင့်လမ်းခွဲခဲ့သည့် စပိန်ဝါရင့်ကွင်းလယ်ကစားသမား ဘူးစကွက်စ်၏နေရာတွင် အစားထိုးမည့်သူမှာ ထိပ်တန်းကစားသမားသာဖြစ်မည်ဟု ပြောကြားခဲ့သည်။
ဘာစီလိုနာအသင်းသည် ၂၀၂၂-၂၃ လာလီဂါရာသီကုန်တွင် အသင်းနှင့်စာချုပ်သက်တမ်းကုန်ဆုံးခဲ့သည့် စပိန်ဝါရင့်ကွင်း လယ်ကစားသမား ဘူးစကွက်စ်အား စာချုပ်သက်တမ်းတိုးခြင်းမပြုဘဲ လမ်းခွဲခြင်းဖြစ်သည်။ အသက် ၃၄ နှစ်အရွယ်ရှိ ဘူးစကွက်စ်သည် ဘာစီလိုနာအသင်းတွင် ၁၅ ရာသီကြာ ကစားခဲ့ပြီး ပြိုင်ပွဲစုံ ၇၂၂ ပွဲအထိ ကစားခဲ့သူဖြစ်သည်။
၎င်းသည် ၂၀၂၂-၂၃ ရာသီက လာလီဂါချန်ပီယံဖြစ်ခဲ့သည့် ဇာဗီ၏ဘာစီလိုနာအသင်းတွင် အဓိကကစားသမားအဖြစ် ခြေစွမ်းပြခဲ့သူဖြစ်သည်။ ဇာဗီက “ကျွန်တော်တို့အနေနဲ့ ကစားသမားအပြောင်းအရွှေ့တွေ ပြုလုပ်ဖို့အတွက် အသင်းဥက္ကဋ္ဌအပါအဝင် ထိပ်တန်းတာဝန်ရှိသူတွေနဲ့ ဆွေးနွေးနေပါတယ်။ တကယ်လို့ ကစားသမားတွေနဲ့ ကစားပြောဖို့လိုတယ်ဆိုရင်လည်း ဖုန်းနဲ့ပဲဖြစ်ဖြစ်၊ Zoom နဲ့ပဲဖြစ်ဖြစ် ဆက်သွယ်ပြီး ပြောဆိုလေ့ရှိပါတယ်။ ဘူးစကွက်စ်ရဲ့နေရာမှာ အစားထိုးမယ့်သူက ထိပ်တန်းကစားသမားတစ်ယောက်ပဲ ဖြစ်ရမှာပါ။ ဘူးစကွက်စ် ကစားတဲ့နေရာက ကျွန်တော်တို့ အသင်းအတွက် အရမ်းအရေးကြီးနေတဲ့ နေရာဖြစ်ပြီး သူ့နေရာကို အစားဝင်မယ့်ကစားသမားအနေနဲ့ ဘူးစကွက်စ်နီးနီး ကောင်းဖို့လိုပါတယ်”ဟု ပြောကြားခဲ့သည်။

ဘာစီလိုနာအသင်းသည် ဘူးစကွက်စ် နေရာအစားထိုးရန် မန်စီးတီးကွင်းလယ်လူ ဂွန်ဒိုဂန်၊ ဘိုင်ယန်မြူးနစ်ကွင်းလယ်လူ ကင်မစ်ချ်တို့ကို ပစ်မှတ်ထားနေကြောင်း သိရသည်။ ထို့ပြင် ဘာစီလိုနာအသင်းသည် ဖီအိုရင်တီးနားကွင်းလယ်လူ အမ်ရာဘတ်ကိုလည်း စိတ်ဝင်စားနေကြောင်း သိရသည်။
