ပေါ့ဘာ၊ ဟော်လန်းတို့၏ အေးဂျင့်အဖြစ် ဆောင်ရွက်နေသော နာမည်ကျော်အေးဂျင့် ရိုင်ယိုလာသည် ဘောလုံးအေးဂျင့်များထဲ၌ အကျိုးအမြတ်အများဆုံးရရှိသူအဖြစ် ရပ်တည်နေပြီး အပြောင်းအရွှေ့တစ်ခုလျှင် ပျမ်းမျှပေါင်(၈)သိန်းနီးပါး ရရှိနေကြောင်း စစ်တမ်းတစ်ခုကို ကိုးကား၍ Daily Mail က ဖော်ပြခဲ့သည်။
ရိုင်ယိုလာသည် အခြားသော နာမည်ကျော်ဘောလုံးအေးဂျင့်များဖြစ်သည့် ဂျော့ချ်မန်ဒက်စ်နှင့် ဂျိုနသန်ဘားနက်တို့ထက် အကျိုးအမြတ်များစွာ ပိုမိုရရှိအောင် စွမ်းဆောင်နိုင်ခြင်းဖြစ်သည်။
လောင်းကစားကုမ္ပဏီတစ်ခုဖြစ်သည့် OLBG မှ ပြုလုပ်ခဲ့သည့် စစ်တမ်းအရ ရိုင်ယိုလာသည် အပြောင်းအရွှေ့တစ်ခုလျှင် ပျမ်းမျှခြင်းအားဖြင့် (၇၉၆၃၄၅)ပေါင် အကျိုးအမြတ်ရရှိပြီး ဂျော့ချ်မန်ဒက်စ်က (၅၀၅၃၀၇) ပေါင်၊ ဂျိုနသန်ဘားနက်က (၁၅၃၀၇၃)ပေါင်သာ ရရှိကြောင်း သိရသည်။
ရိုင်ယိုလာသည် ပြိုင်ဘက်အေးဂျင့်များကဲ့သို့ ကစားသမားအများအပြားနှင့် လက်တွဲထားခြင်းမရှိဘဲ တန်ဖိုးကြီးကစားသမားများအပါအဝင် ကစားသမားအနည်းငယ်နှင့်သာ လက်တွဲထားခြင်းကြောင့် ယခုကဲ့သို့ အကျိုးအမြတ်ရရှိ နေခြင်းဖြစ်ကြောင်းလည်း သိရသည်။
ရိုင်ယိုလာသည် ကစားသမား(၇၇)ဦးနှင့်သာ လက်တွဲထားပြီး ဂျော့ချ်မန်ဒက်စ်က (၁၄၉)ဦး၊ ဂျိုနသန်ဘားနက်က (၆၇၃)ဦးနှင့် လက်တွဲထားခြင်းဖြစ်သည်။
ရိုင်ယိုလာ လက်တွဲထားသည့် ကစားသမားများ၏ တန်ဖိုးစုစုပေါင်းမှာ သန်း(၈၀၀)နီးပါး တန်ကြေးရှိကြောင်းလည်း သိရသည်။
ရိုင်ယိုလာသည် အပြောင်းအရွှေ့အတွက် ကစားသမားများထံမှ ကော်မရှင်ကြေးရယူရာတွင် ပြိုင်ဘက်အေးဂျင့်များထက် နည်းပါးသော်လည်း တန်ဖိုးမြင့်မားသည့် အပြောင်းအရွှေ့များကို လုပ်ဆောင်နိုင်ခြင်းကြောင့် အကျိုးအမြတ်ပိုမိုရရှိခြင်းဖြစ်ကြောင်းလည်း သိရသည်။
ရိုင်ယိုလာသည် လက်ရှိနွေရာသီအပြောင်းအရွှေ့ကာလတွင်လည်း ပေါ့ ဘာနှင့် ဟော်လန်းတို့၏ အပြောင်းအရွှေ့များ ဖြစ်မြောက်လာစေရန် ကြိုးပမ်းလျက်ရှိသည်။
ရိုင်ယိုလာသည် ကစားသမားအပြောင်းအရွှေ့များမှ ကော်မရှင်ကြေး ပေါင်သန်း(၆၀)ကျော် ရရှိထားပြီးဖြစ်ကြောင်း သိရသည်။
