ဘောလုံးသုံးသပ်သူအဖြစ် ဆောင်ရွက်နေသည့် ပရီးမီးယားလိဂ်တိုက်စစ်မှူးဟောင်း အလန်ရှီးယားက လာမည့် ကမ္ဘာ့ဖလားပြိုင်ပွဲတွင် အင်္ဂလန်နည်းပြ ဆောက်ဂိတ်အနေဖြင့် နောက်ခံလူ မက်ဂွိုင်းရားကို ပွဲထွက်ခွင့်ပေးခဲ့ပါက ကြီးမားသည့် အလောင်းအစားတစ်ခုဖြစ်လိမ့်မည်ဟု သုံးသပ်ပြောကြားခဲ့သည်။
အင်္ဂလန်အသင်းနည်းပြ ဆောက်ဂိတ်သည် ၂၀၂၂ ကမ္ဘာ့ဖလားပြိုင်ပွဲဝင်မည့် အသင်းလူစာရင်း (၂၆) ဦးကို ထုတ်ပြန်ရာတွင် မန်ယူအသင်း၌ ပုံမှန်ပွဲကစားခွင့်ရရန် ရုန်းကန်နေရသည့် မက်ဂွိုင်းရားကို ရွေးချယ်ခဲ့ခြင်းအတွက် ဝေဖန်မှုများနှင့် ရင်ဆိုင်နေရသည်။
အလန်ရှီးယားက “ပြီးခဲ့တဲ့ ပြိုင်ပွဲတွေမှာ မက်ဂွိုင်းရား ဘာတွေ စွမ်းဆောင်ပြခဲ့သလဲဆိုတာ ကျွန်တော်တို့ ကောင်းကောင်းသိပါတယ်။ ဒါကြောင့် ဆောက်ဂိတ်ကလည်း သူ့ကို ဦးစားပေးအဖြစ် သတ်မှတ်ထားပါတယ်။ ဒါပေမဲ့ ကလပ်အသင်းအတွက် မကစားရတဲ့သူကို ပွဲထွက်ခွင့်ပေးရင်တော့ ကြီးမားတဲ့ အလောင်းအစားတစ်ခု၊ စွန့်စားခန်းတစ်ခု ဖြစ်ပါလိမ့်မယ်”ဟု ပြောကြားခဲ့သည်။
မက်ဂွိုင်းရားသည် မန်ယူအသင်းတွင် ရုန်းကန်နေရသော်လည်း ၂၀၁၈ ကမ္ဘာ့ဖလားနှင့် ယူရို-၂၀၂၀ ပြိုင်ပွဲတွင် အင်္ဂလန်လက်ရွေးစင်အသင်း၌ အဓိက ကစားသမားအဖြစ် ပါဝင်ခြေစွမ်းပြခဲ့သူ ဖြစ်သည်။
