ဆော်ဒီကလပ် အယ်လ်အာလီအသင်းသည် မန်စီးတီးအသင်းမှ အယ်လ်ဂျီးရီးယားတောင်ပံကစားသမား မာရက်ဇ်ကို ခေါ်ယူရန် ပုဂ္ဂိုလ်ရေးသဘောတူညီမှု ရရှိခဲ့ပြီဖြစ်ကြောင်း ဥရောပမီဒီယာများစွာက ဖော်ပြခဲ့သည်။
မာရက်ဇ်(၃၂ နှစ်)သည် အစောပိုင်းက မန်စီးတီးအသင်းမှ ထွက်ခွာရန် ဆန္ဒမရှိဟု သတင်းထွက်ခဲ့သော်လည်း အယ်လ်အာလီအသင်းက တစ်နှစ်လစာ ယူရိုသန်း(၅၀)ဖြင့် (၂)နှစ်စာချုပ်ချုပ်ဆိုရန် ကမ်းလှမ်းခဲ့ခြင်းကြောင့် လက်ခံလိုက်ခြင်းဖြစ်ကြောင်း သိရသည်။
အယ်လ်အာလီအသင်းသည် ဆော်ဒီလိဂ်ကို စတင်ထူထောင်ခဲ့သည့် အသင်း(၄)သင်းစာရင်းတွင် ပါဝင်ခဲ့သော်လည်း ပြီးခဲ့သည့်ရာသီတွင် အံ့အားသင့်ဖွယ် တန်းဆင်းခဲ့ရပြီး ယခုနှစ်မှ တန်းပြန်တက်လာခဲ့ခြင်း ဖြစ်သည်။ အယ်လ်အာလီသည် ယခုနွေရာသီတွင် ပရီးမီးယားလိဂ်မှ လီဗာပူးလ်တိုက်စစ်မှူး ဖေမီနိုနှင့် ချယ်လ်ဆီးဂိုးသမား မန်ဒီတို့ကို ခေါ်ယူထားသည့်အသင်းဖြစ်ပြီး ယခု မာရက်ဇ်ကို သဘောတူညီမှု ထပ်ယူနိုင်ခဲ့ခြင်းဖြစ်ကြောင်း သိရသည်။
အယ်လ်အာလီ အသင်းသည် မာရက်ဇ်အတွက် မန်စီးတီးအသင်းထံ ပြောင်းရွှေ့ကြေး ယူရို(၃၅)သန်းဖြင့် ကမ်းလှမ်းထားပြီး မန်စီးတီးအသင်းက လက်ခံဖွယ်ရှိကြောင်းလည်း သိရသည်။ မာရက်ဇ်သည် မန်စီးတီးအသင်းနှင့် ၂၀၂၅ ခုနှစ်အထိ စာချုပ်သက်တမ်းကျန်ရှိနေသလို၊ ပြီးခဲ့သည့်ရာသီက ပြိုင်ပွဲစုံ(၄၇)ပွဲကစားခဲ့သော်လည်း ၎င်း၏ဈေးကွက်တန်ဖိုးမှာ ယူရိုသန်း(၂၀)ဝန်းကျင်သာရှိတော့သည့်အတွက် မန်စီးတီးအသင်းက ရောင်းထုတ်ဖွယ်ရှိသည်ဟု သုံးသပ်နေခြင်းဖြစ်ကြောင်းလည်း သိရသည်။
