အာဆင်နယ်အသင်းသို့ ပြောင်းရွှေ့ရန် သဘောတူညီမှုရထားသည့် ချယ်လ်ဆီးအသင်း တိုက်စစ်ကစားသမား ဟာဗက်ဇ်သည် ယခုရက်သတ္တပတ်ကုန်တွင် အာဆင်နယ်အသင်းနှင့် ဆေးစစ်မှုပြုလုပ်မည်ဖြစ်ကြောင်း ဗြိတိန်အခြေစိုက် Sky Sports သတင်းဌာနက ဖော်ပြခဲ့သည်။
အာဆင်နယ်အသင်းသည် အသက် ၂၄ နှစ်အရွယ် ဂျာမနီလက်ရွေးစင်ကစားသမား ဟာဗက်ဇ်ကို ပေါင် ၆၅ သန်းဖြင့် ခေါ်ယူရန် ဗုဒ္ဓဟူးနေ့ကတည်းက သဘောတူညီမှု ရရှိထားသည်။ Sky Sports သတင်းဌာန၏ ဖော်ပြမှုအရ ဟာဗက်ဇ်အနေဖြင့် ယခုရက် သတ္တပတ်ကုန်တွင် အာဆင်နယ်အသင်းနှင့် ဆေးစစ်မှုပြုလုပ်မည်ဖြစ်ပြီး နွေရာသီအားလပ်ရက်ဖြစ်သောကြောင့် ဆေးစစ်မှုကို ပြည်ပ၌သာ ပြုလုပ်ဖွယ်ရှိကြောင်း သိရသည်။
၎င်းအား အာဆင်နယ်ကစားသမားအဖြစ် ကြေညာမှုကို လာမည့်ရက်သတ္တပတ်မှသာပြုလုပ်မည်ဖြစ်သည်။ အာဆင်နယ်အသင်းအနေဖြင့် ၎င်းအတွက် ကနဦးပြောင်းရွှေ့ကြေး ပေါင် သန်း ၆၀ နှင့် Add-ons ကြေး ပေါင်ငါးသန်း ပေးချေရမည်ဖြစ်ကြောင်း ဗြိတိန်သတင်းဌာနများက ဖော်ပြခဲ့သည်။
ဟာဗက်ဇ်သည် ၂၀၂၀ နွေရာသီတွင် လေဗာကူဆင်အသင်းမှ ချယ်လ်ဆီးအသင်း သို့ ကလပ်စံချိန်တင်ပြောင်းရွှေ့ကြေး ပေါင် ၇၂ သန်းဖြင့် ရောက်ရှိလာသူဖြစ်ပြီး သုံးရာသီ အတွင်း ၁၃၉ ပွဲကစား၊ ၃၂ ဂိုးသာ သွင်းယူနိုင်ခဲ့သလို ခြေစွမ်းပြနိုင်ရန် ရုန်းကန်ခဲ့ရသည်။
