မန်စီးတီးကွင်းလယ်ကစားသမား ဒီဘရိုင်းနားက ယခု ၂၀၂၂-၂၃ ရာသီမှာ မိမိတို့ အသင်းအတွက် အလွန်ခက်ခဲသည့်ရာသီဖြစ်ကြောင်း ဝန်ခံပြောကြားခဲ့သည်။
မန်စီးတီးအသင်းသည် ယခုရာသီတွင် ပြီးခဲ့သည့် ၂၀၂၁ -၂၂ ရာသီကဲ့သို့ စွမ်းဆောင်နိုင်ခြင်းမရှိသဖြင့် ဝေဖန်မှုများနှင့် ရင်ဆိုင်နေရသည်။ ထို့ပြင် ဒီဘရိုင်းနားအနေဖြင့် ပြီးခဲ့သည့် ရက်သတ္တပတ်များအတွင်း အသင်း၏ အရေးကြီးပွဲစဉ်အချို့တွင် ပွဲထွက်ပါဝင်ကစားခွင့်မရဘဲ အနားပေးခံရသည့်အချိန်များလည်း ရှိခဲ့သည်။ ထို့ကြောင့် ဒီဘရိုင်းနားက ယခုရာသီမှာ မိမိတို့အသင်းအတွက် အလွန်ခက်ခဲသည့် ရာသီဖြစ်ကြောင်း ပြောကြားခဲ့ခြင်းဖြစ်သည်။
ဒီဘရိုင်းနားက “ပရီးမီးယားလိဂ်အသင်းတွေရဲ့ စွမ်းရည်တွေကြောင့် ရာသီတိုင်းက တစ်နှစ်ထက်တစ်နှစ် ပိုပြီးခက်ခဲလာတယ်လို့ ကျွန်တော် ထင်ပါတယ်။ အသင်းတိုင်းက သူတို့ အသင်းတွေကို အကောင်းဆုံးဖြစ်ဖို့ ပြင်ဆင်ကြပြီး စွမ်းဆောင်ရည်တွေလည်း ပိုကောင်းလာကြပါတယ်။ ဒါကြောင့် ပရီးမီးယားလိဂ်မှာ ဘယ်အသင်းနဲ့ပဲ ကစားကစား ခက်ခဲတာချည်းပါပဲ။ ပြီးတော့ ပြီးခဲ့တဲ့ရာသီက ချန်ပီယံဖြစ်ခဲ့တာကြောင့် ကျွန်တော်တို့နဲ့ တွေ့တဲ့အသင်းတိုင်းက ကျွန်တော့်တို့အသင်းကို အနိုင်ရဖို့ အသည်းအသန်ကြိုးစားကြပါတယ်။ ဒီတော့ ကျွန်တော်တို့အနေနဲ့ အောင်မြင်မှုတွေကို ဆက်ထိန်းချင်တယ်ဆိုရင် ခြေစွမ်းကောင်းကို ဆက်ထိန်းထားဖို့လိုပါတယ်”ဟု ပြောကြားခဲ့သည်။
ထို့ပြင် ဒီဘရိုင်းနားက ယခုရာသီတွင် ပရီးမီးယားလိဂ်ချန်ပီယံဆုအတွက် အပြိုင်ဖြစ်နေသည့် အာဆင်နယ်အသင်းမှာ အလွန်ကောင်းသည့်အသင်းတစ်သင်းဖြစ်ကြောင်းနှင့် အနိုင်ယူရန်ခက်ခဲသည့်အသင်းဖြစ်ကြောင်းလည်း ပြောကြားခဲ့သည်။
