မန်စီးတီးအသင်းသည် ပြင်သစ်ကလပ် ရန်းစ်အသင်းမှ ဘယ်လ်ဂျီယံတောင်ပံကစားသမား ဂျရေမီဒိုကူကို ပေါင် (၅၅.၅)သန်းဖြင့် သဘောတူညီမှုရရှိခဲ့ပြီး ယခုရက်ပိုင်းအတွင်း စာချုပ်ချုပ်ဆိုဖွယ်ရှိကြောင်း သိရသည်။
မန်စီးတီးအသင်းသည် အယ်လ်ဂျီးရီးယားတောင်ပံကစားသမား မာရက်ဇ်ကို ဆော်ဒီကလပ် အယ်လ်အာလီအသင်းထံ ရောင်းချခဲ့ပြီးနောက် ၎င်း၏နေရာတွင် ပြန်လည်အစားထိုးရန် ဒိုကူကို ခေါ်ယူခြင်းဖြစ်ကြောင်း သိရသည်။
ဒိုကူ(၂၁ နှစ်) သည် ပြီးခဲ့သည့်ရာသီတွင် ရန်းစ်အသင်းအတွက် အဓိကကစားသမားတစ်ဦးအဖြစ် ခြေစွမ်းပြနိုင်ခဲ့သလို၊ ၂၀၂၃-၂၄ ရာသီအဖွင့်ပွဲတွင်လည်း ဂိုးတစ်ဂိုးသွင်းယူကာ ခြေစွမ်းပြခဲ့သည်။
သို့သော် ၎င်းသည် တံကောက်ကြောဒဏ်ရာပြဿနာနှင့် မကြာခဏ ရင်ဆိုင်ခဲ့ရသူဖြစ်သောကြောင့် မန်စီးတီးအသင်းအတွက် အန္တရာယ်များသည့် ခေါ်ယူမှုဖြစ်ကြောင်း ဝေဖန်မှုများလည်း ရှိနေသည်။
မန်စီးတီးအသင်းသည် ယခုနွေရာသီအပြောင်းအရွှေ့ကာလတွင် ချယ်လ်ဆီးမှ ကိုဗာချစ်နှင့် လိုက်ပ်ဇစ်မှ ဂီဗာဒီယိုလ်တို့ကိုသာ ခေါ်ယူထားသည့်အတွက် ဒိုကူမှာ တတိယမြောက်ကစားသမားသစ်အဖြစ် မှတ်တမ်းဝင်မည်ဖြစ်သည်။
မန်စီးတီးအသင်းသည် ဒိုကူ၏အပြောင်းအရွှေ့ကို ယခုရက်ပိုင်းအတွင်း အပြီးသတ်နိုင်ရန် လုပ်ဆောင်လျက်ရှိပြီး လာမည့် ရှက်ဖီးယူနိုက်တက်နှင့်ပွဲလူစာရင်းတွင် ပါဝင်လာဖွယ်ရှိကြောင်း Daily Mail က ဖော်ပြခဲ့သည်။
မန်စီးတီးအသင်းသည် ဒိုကူကို ခေါ်ယူရန် ပြီးခဲ့သည့်ရာသီကတည်းက စိတ်ဝင်စားခဲ့ခြင်းဖြစ်ပြီး ဂွါဒီယိုလာက အသင်း၏အနာဂတ်အတွက် ရေရှည်အသုံးပြုရန် ရည်ရွယ်ခြင်းဖြစ်ကြောင်း သိရသည်။
ယခုနွေရာသီတွင် ပရီးမီးယားလိဂ်အသင်းများစွာ၏ စိတ်ဝင်စားခြင်းခံခဲ့ရသော ဒိုကူကို ခေါ်ယူရန် မန်စီးတီးအသင်းက သြဂုတ်(၁)ရက်ကတည်းက ရန်းစ်အသင်းနှင့် ဆွေးနွေးညှိနှို်င်းခဲ့ခြင်းဖြစ်ပြီး ယခုမှ သဘောတူညီမှုရရှိခဲ့ခြင်းဖြစ်ကြောင်း သိရသည်။
မန်စီးတီးအသင်းသည် ၎င်းကို နှစ်ရှည်စာချုပ် ချုပ်ဆိုသွားမည်ဟု သိရသည်။
