ရီးယဲလ်ကွင်းလယ်လူ တိုနီကရို့စ်က အသင်းခေါင်းဆောင် ရာမို့စ်အား အသင်းတွင် ဆက်ရှိနေရန် မျှော်လင့်ကြောင်း ပြောကြားခဲ့သည်။
အသက် (၃၅)နှစ်အရွယ်ရှိ စပိန်ဝါရင့်နောက်ခံလူ ရာမို့စ်သည် ဇွန်လ (၃၀)ရက်တွင် ရီးယဲလ်အသင်းနှင့် စာချုပ်သက်တမ်းကုန်ဆုံးမည်ဖြစ်ပြီး စာချုပ်သက်တမ်းတိုးရေးကိစ္စမှာ အဆင်မပြေဖြစ်နေကြောင်း စပိန်မီဒီယာများက ဖော်ပြနေကြသည်။
တိုနီကရို့စ်က ရာမို့စ်မှာ မိမိကစားသမားဘဝတစ်လျှောက် အကောင်းဆုံးအသင်းခေါင်းဆောင်ဖြစ်သည့်အတွက် ရီးယဲလ်အသင်းတွင် ဆက်ရှိနေစေလိုသည်ဟု ပြောကြားခဲ့သည်။
တိုနီကရို့စ်က “အသင်းတွင်း အခြေအနေတွေ ဘယ်လိုရှိတယ်ဆိုတာကို ကျွန်တော် မသိပါဘူး။ သူက ကျွန်တော် တွဲဖက်ကစားဖူးတဲ့ ထိပ်တန်းကစားသမားတွေထဲက တစ်ဦးဖြစ်ပြီး နောက်နှစ်တွေမှာလည်း သူနဲ့တွဲပြီး ကစားချင်ပါတယ်။ ဒါပေမဲ့ ဒီကိစ္စတွေက ကျွန်တော် ဆုံးဖြတ်နိုင်တဲ့အရာတွေ မဟုတ်ပါဘူး။ ကျွန်တော် ပြောနိုင်တာကတော့ ရာမို့စ်ဟာ ထိပ်တန်းကစားသမားတစ်ဦးဖြစ်ပြီး ကျွန်တော့်ရဲ့ကစားသမားဘဝတစ်လျှောက် ဆုံတွေ့ခဲ့တဲ့ အသင်းခေါင်းဆောင်တွေထဲမှာ သူက အကောင်းဆုံးပါ”ဟု ပြောကြားခဲ့သည်။
ရီးယဲလ်အသင်းသည် ရာမို့စ်အား တစ်နှစ်ချင်းစီသာ သက်တမ်းတိုးရန် အလိုရှိနေသော်လည်း ရာမို့စ်က အနည်းဆုံး (၂)နှစ် စာချုပ်သက်တမ်းတိုးရန် အလိုရှိနေကြောင်း သိရသည်။
ယခုနွေရာသီအပြောင်းအရွှေ့ကာလတွင် ပြောင်းရွှေ့ကြေးအလွတ်ဖြင့် ထွက်ခွာခွင့်ရှိနေသည့် ရာမို့စ်အား ခေါ်ယူရန် PSG၊ မန်စီးတီး၊ ချယ်လ်ဆီးနှင့် အသင်းဟောင်း ဆီဗီလာတို့က စိတ်ဝင်စားနေကြောင်း သိရသည်။
