ရီးယဲလ်မက်ဒရစ်အသင်း၏ ဝေးလ်စ်တောင်ပံကစားသမား ဂါရတ်ဘေးလ်က ရီးယဲလ်အသင်းအား တစ်ကျော့ပြန်ကိုင်တွယ်ခဲ့သည့် အီတလီလူမျိုးနည်းပြ အန်ဆယ်လော့တီအနေဖြင့် အသင်းတွင် အောင်မြင်မှုများထပ်ယူနိုင်လိမ့်ဦးမည်ဖြစ်ကြောင်း ပြောကြားခဲ့သည်။
အီတလီအသင်းနှင့်ယှဉ်ပြိုင်ခဲ့သည့် ယူရို-၂၀၂၀ အုပ်စုပွဲစဉ် ပွဲကြိုသတင်းစာရှင်းလင်းပွဲ၌ ဘေးလ်က ယခုကဲ့သို့ပြောကြားခဲ့ခြင်းဖြစ်ပြီး မိမိတို့ (၂)ဦးအကြား အလွန်ကောင်းမွန်သည့် ဆက်ဆံရေးရှိကြောင်းလည်း ဖွင့်ဟခဲ့သည်။
ဘေးလ်သည် ယခင်နည်းပြ ဇီဒန်းလက်ထက်တွင် အသင်းနှင့်ပွဲကစားခွင့် ပျောက်ဆုံးခဲ့ပြီး ပြီးခဲ့သည့်ရာသီက စပါးအသင်းသို့ တစ်ရာသီအငှားစာချုပ်ဖြင့် သွားရောက်ကစားခဲ့သူဖြစ်သည်။
အန်ဆယ်လော့တီသည် ရီးယဲလ်အသင်းအား ပထမအကြိမ်ကိုင်တွယ်သည့် ၂၀၁၃ ခုနှစ်တွင် ဘေးလ်အား အသင်းသို့ခေါ်ယူခဲ့သူဖြစ်ပြီး ၎င်း၏လက်အောက်တွင် ဘေးလ်မှာ အကောင်းဆုံးခြေစွမ်းကို ပြသနိုင်ခဲ့သည်။
ဂါရတ်ဘေးလ် (၃၁ နှစ်)က ”ကျွန်တော်ပြောလိုတဲ့ တစ်ခုတည်းသော အကြောင်းအရာကတော့ သူ (အန်ဆယ်လော့တီ)နဲ့ ကျွန်တော့်အကြားမှာ အလွန်ကောင်းမွန်တဲ့ဆက်ဆံရေးရှိတယ်ဆိုတာပါပဲ။ သူဟာ ထိပ်တန်းနည်းပြတစ်ဦးဖြစ်ပြီး ရီးယဲလ်အသင်းမှာ ခမ်းနားတဲ့အောင်ပွဲတွေကို ထပ်ယူပြနိုင်ပါလိမ့်မယ်”ဟု ပြောကြားခဲ့သည်။
လက်ရှိတွင် ဘေးလ်အနေဖြင့် အန်ဆယ်လော့တီကိုင်တွယ်မည့် ရီးယဲလ်အသင်းတွင် ပုံမှန်ပွဲကစားခွင့်ပြန်ရရန် ကြိုးစားသွားဖွယ်ရှိနေကြောင်း လည်း သိရသည်။
