၂၀၂၂ Ballon d’Or ဆုကို ပူပူနွေးနွေး ရရှိထားသည့် ရီးယဲလ်ဝါရင့်တိုက်စစ်မှူး ဘန်ဇီမာက မိမိအနေဖြင့် ရီးယဲလ်အသင်းတွင်သာ ကစားသမားဘဝ ကုန်ဆုံးလိုကြောင်း ပြောကြားခဲ့သည်။
အသက် (၃၄) နှစ်အရွယ်ရှိ ပြင်သစ်တိုက်စစ်မှူး ဘန်ဇီမာသည် ၂၀၀၉ ခုနှစ်တွင် ရီးယဲလ်အသင်းသို့ ရောက်ရှိလာသူဖြစ်ပြီး ၎င်း၏ လက်ရှိစာချုပ်မှာ ၂၀၂၄ ဇွန် (၃၀) ရက်တွင် ကုန်ဆုံးမည်ဖြစ်သည်။
ဘန်ဇီမာအနေဖြင့် ရီးယဲလ်နှင့် စာချုပ်သက်တမ်းကုန်ဆုံး ချိန်တွင် အသင်းဟောင်း လိုင်ယွန်သို့ ပြန်မည်ဟု သတင်းများထွက်ပေါ်နေသည်။
Onda Cero နှင့် တွေ့ဆုံမှုတွင် အင်တာဗျူးသူက ရီးယဲလ်တွင် ဆက် ကစားလိုသလားဟု မေးမြန်းခဲ့ရာ ဘန်ဇီမာက”ကျွန်တော့်မှာ တခြားရွေးစရာမရှိပါဘူး။ ရီးယဲလ်ကို ပြောင်းရွှေ့ ခွင့်ရခဲ့တာက ကျွန်တော့်ရဲ့ အိပ်မက် ဖြစ်ပါတယ်။ ဒီအသင်းမှာပဲ ကစားသမားဘဝကုန်ဆုံးပြီး အနားယူချင်ပါတယ်”ဟု ဆိုခဲ့သည်။
ဘန်ဇီမာသည် ရီးယဲလ်အတွက် ပြိုင်ပွဲစုံ (၃၂၈) ဂိုးအထိ သွင်းယူပေးထားသည်။
