ရီးယဲလ်အသင်း၏ ကစားသမားသစ် ဘယ်လင်ဟမ်က ကြာသပတေးနေ့က ဘာနေဗျူးကွင်းတွင် ၎င်း၏မိတ်ဆက်ပွဲအခမ်းအနားတွင် ရီးယဲလ်အသင်းသည် အကြီးကျယ်အခမ်းနားဆုံးအသင်းဖြစ်ကြောင်း ဝန်ခံပြောကြားခဲ့သည်။
အင်္ဂလန်ကွင်းလယ်ကစားသမား ဘယ်လင်ဟမ်သည် ဒေါ့မွန်အသင်းမှ ရီးယဲလ်အသင်းသို့ ပြောင်းရွှေ့ကြေး ယူရို (၁၀၃)သန်း (Add-ons ကြေး ယူရို ၃၀.၉ သန်း)ဖြင့် ပြောင်းရွှေ့ခဲ့ခြင်းဖြစ်ပြီး (၆)နှစ်စာချုပ် ချုပ်ဆိုခဲ့သည်။
ဘယ်လင်ဟမ် (၁၉ နှစ်)သည် ပရီးမီးယားလိဂ်ထိပ်သီးအသင်းများစွာ ခေါ်ယူရန် စိတ်ဝင်စားနေသည့်ကြားမှ ရီးယဲလ်အသင်းကို ရွေးချယ်ခဲ့ခြင်းဖြစ်သည်။
ယင်းအခြေအနေအတွက် ဘယ်လင်ဟမ်က “လက်ရွေးစင် အသင်းမှာရှိတဲ့ ကျွန်တော့်သူငယ်ချင်းတွေက ပရီးမီးယားလိဂ်ကို ပြောင်းရွှေ့လာစေချင်ကြပါတယ်။ အဲဒါက ကျွန်တော့်အတွက် သက်သောင့်သက်သာပိုရှိပြီး ပိုလွယ်ကူစေနိုင်ပါတယ်။ ဒါပေမဲ့ အကြီးကျယ်အခမ်းနားဆုံး ရီးယဲလ်မက်ဒရစ်အသင်းရဲ့ ကမ်းလှမ်းမှုကို ကျွန်တော် မငြင်းပယ်နိုင်ပါဘူး။ ရီးယဲလ်အသင်းက ကျွန်တော့်ကို ခေါ်ယူဖို့ စိတ်ဝင်စားနေတယ်လို့ ကြားလိုက်ရချိန်မှာ ကျွန်တော် နှလုံးခုန်ရပ်တော့မလိုတောင် ဖြစ်သွားခဲ့ပါတယ်”ဟု ပြောကြားခဲ့သည်။
ဘယ်လင်ဟမ်က ရီးယဲလ်ကစားသမားဘဝ ပထမဆုံးပြုလုပ်ခဲ့သည့် သတင်းစာရှင်းလင်းပွဲ၌ မိမိ၏ ဘဝတစ်လျှောက် ဂုဏ်ယူစရာအကောင်းဆုံးနေ့ရက်ဖြစ်ကြောင်းလည်း ဆိုခဲ့သည်။
“ကျွန်တော် ငွေကြေးအကြောင်း မစဉ်းစားခဲ့ပါဘူး။ ဒေါ့မွန်အသင်းက အပြောင်းအရွှေ့အတွက် ဆွေးနွေးခွင့်ပြုလိုက်ချိန်မှာ မြန်မြန်ပြီးမြောက်ချင်စိတ်ပဲ ရှိခဲ့ပါတယ်။ ကျွန်တော့်အတွက် ရီးယဲလ်က အကြီးကျယ်အခမ်းနားဆုံးအသင်းပါ”ဟုလည်း ဘယ်လင်ဟမ်က ပြောကြားခဲ့သည်။
ဘယ်လင်ဟမ်သည် ရီးယဲလ်အသင်းသို့ ရောက်ရှိသည့် (၆)ဦးမြောက် အင်္ဂလန်ကစားသမားအဖြစ် မှတ်တမ်းဝင်ခဲ့ကြောင်း သိရသည်။
